“Azərxalça”nın “Zəfər” xalça kolleksiyası təqdim olundu

“Azərxalça” ASC-nin ölkəmizin Vətən müharibəsində əldə etdiyi möhtəşəm Qələbənin il dönümünə həsr olunmuş “Zəfər” kolleksiyası üçün ən yaxşı xalça müsabiqəsinin qaliblərinin əsərləri il ərzində toxunaraq artıq başa çatıb.

"Ölkə.Az" xəbər verir ki, “Zəfər” kolleksiyasına daxil olan ilk 4 yerin qaliblərinin xalçalarının noyabr ayının 3-də “Azərxalça”nın İçərişəhərdə yerləşən nümayiş və satış salonunda ictimai xadimlər, incəsənət nümayəndələri və müsabiqənin digər iştirakçılarının da qatıldığı geniş təqdimat mərasimi baş tutub.

Tədbirdə həmçinin “Azərxalça”nın regionlarda yerləşən emalatxanalarında müxtəlif vəzifələrdə çalışan Vətən müharibəsi iştirakçıları, qazi işçiləri də iştirak ediblər.

Toxunan xalçalar müsabiqənin xatirəsi olaraq “Azərxalça”nın nümayiş və sərgi salonunda saxlanılacaq. Gün ərzində xalçalara baxmaq istəyən hər kəs salona baş çəkib rahatlıqla bu sənət əsərlərindən həzz ala bilər.

Fidan İlham birinci yerin qalibi (“Zəfəri bizə gətirənlər” xalçası), Aytac Ələkbərli ikinci yerin qalibi (“Dəmir yumruq” xalçası), Təhminə Məmmədova üçüncü yerin qalibi ("Dönüş” xalçası), Maya İbadlı sosial şəbəkələrin nəticələri üzrə qalib (“Cənnətə giriş” xalçası) olub.

Könül

Ölkə.Az