“28” filmi Türkiyədə Beynəlxalq Film Festivalında final mərhələsinə seçilib

Türkiyənin Xaricdə Yaşayan Türklər və Ə qraba Topluluqları İdarəsi (YTB), Mədəniyyət və Turizm Nazirliyi Sinema Genel Müdürlüyü, TRT, Anadolu Agentliyi və Boğaziçi Kültür Sanat Vəqfinin təşkilatçılığı ilə ilk dəfə keçirilən Diaspora Beynəlxalq Qısa Film Festivalı başa çatıb.

"Ölkə.Az" xəbər verir ki, festivala 120 ölkədən 3123 film təqdim edilib. Münsiflər heyəti festivalın final mərhələsinə 24 film seçib. Onların arasında türkdilli filmlər kateqoriyasında azərbaycanlı rejissor Elçin Ağazadənin çəkdiyi qısametrajlı "28” bədii-sənədli filmi də olub. Film Niderlandda yaşayan jurnalist Xatirə Sərdarqızının 12 yaşında olarkən Birinci Qarabağ müharibəsi zamanı aldığı psixoloji sarsıntıdan, 28 illik həsrətdən sonra işğaldan azad edilən doğma Şuşaya qovuşmasından və öz uşaqlıq illərinə qayıtmasından bəhs edir.

“27-29 avqust tarixlərində İstanbulun “Atlas” kinoteatrında filmlərin nümayişi təşkil edilib. Türkiyəli tamaşaçılar "28” filmini böyük maraqla qarşılayıblar.

Qeyd edək ki, ekran əsəri Diasporla İş üzrə Dövlət Komitəsinin dəstəyi və Niderland-Belçika Azərbaycanlılarının Koordinasiya Şurasının təşkilatçılığı ilə hazırlanıb.

Növbəti beynəlxalq festivallara təqdim olunması nəzərdə tutulan filmin quruluşçu rejissoru Elçin Ağazadə, baş prodüsseri Xatirə Sərdarqızı, ssenari müəllifi Orxan Bahadırsoy, ikinci rejissor Afaq Yusifli, icraçı prodüsser Vüqar Yusifoğlu, quruluşçu operator Soltan Abdullayev, operator Tərlan Haqverdiyev, quruluşçu rəssam Ceyhun Cəfərquluyev, geyim üzrə rəssam Aynur Əliyeva, qrim Həbibə Qaziyeva, səs rejissoru Sergey Netrunenkodur. Rolları X. Sərdarqızı və Nuray Məmmədzadə canlandırıblar.