İsrailin müdafiə naziri Zakir Həsənova təşəkkür edib - YENİLƏNİB

Bu barədə "Ölkə.Az"a Azərbaycan Müdafiə Nazirliyindən bildirilib.

Telefon danışığı əsnasında tərəflər ikitərəfli hərbi-texniki əməkdaşlığın  perspektivlərinə dair fikir mübadiləsi aparıblar. İsrailin Müdafiə naziri Azərbaycana səfərini məmnunluqla xatırlayıb.

Benyamin Qantz Azərbaycan-İsrail münasibətlərinin dostluq və qarşılıqlı etimada əsaslandığını qeyd edib, Azərbaycanın Təl-Əvivdə səfirliyinin açılması qərarına görə təşəkkürünü ifadə edib.

*** 14:54

Bazar günü Azərbaycan və İsrailin müdafiə nazirləri Zakir Həsənov və Benni Qantz arasında telefon danışığı olub, onlar iki ölkə arasında əməkdaşlığın gücləndirilməsini müzakirə ediblər.

"Ölkə.az" xəbər verir ki, bu barədə İsrail Müdafiə Nazirliyinin mətbuat xidməti məlumat yayıb.

İsrailli nazir Bakının Təl-Əvivdə səfirlik açmaq qərarına görə həmkarına da təşəkkür edib.

"Bu səhər dostum, Azərbaycanın müdafiə naziri, general-polkovnik Zakir Həsənovla danışdım. Azərbaycan parlamentinin İsraildə səfirliyin açılması ilə bağlı qəbul etdiyi mühüm qərara görə İsrailin müdafiə strukturları adından ona təşəkkür etdim", - mətbuat xidmətinin yaydığı məlumatda deyilir.

Tezliklə yeni kabinetlə əvəzlənəcək İsrailin hazırkı hökuməti ilə birgə işini başa çatdıran Qantz son illər birgə səmərəli fəaliyyətinə görə Z.Həsənova təşəkkür edib. 

"Mən də ona bu illər ərzində İsrail və Azərbaycan arasında müdafiə əlaqələrinin gücləndirilməsinə göstərdiyi tərəfdaşlıq və sadiqliyinə görə təşəkkür etdim. Bu, ölkələrimiz arasında dərin dostluğu əks etdirir və əminəm ki, bundan sonra da inkişaf edəcək və regiona müsbət təsir göstərəcək", - İsrail rəsmisi bildirib.

Noyabrın 18-də Azərbaycan parlamenti İsraildə səfirliyin açılması barədə qərarı təsdiqləyib. Təsdiq edilmiş sənədə əsasən, diplomatik nümayəndəlik Təl-Əvivdə yerləşəcək. Azərbaycan ilə İsrail arasında diplomatik əlaqələr 1992-ci ilin aprelində qurulub. 1993-cü ilin avqustunda Bakıda İsrail dövlətinin səfirliyi açılıb.

Elvin

Ölkə.az