Azərbaycanda 1,6 milyonluq dövlət şirkəti satışa çıxarılır

 “Azərbaycan Sənaye Korporasiyası” ASC-yə məxsus “ASK Tekstil” MMC özəlləşdiriləcək.

"Ölkə.Az" xəbər verir ki, müəssisənin özəlləşdirilməsinə investorların cəlb edilməsi məqsədilə İqtisadiyyat Nazirliyi yanında Əmlak Məsələləri Dövlət Xidməti tərəfindən 30-dan artıq xarici şirkətə müraciətlər ünvanlanıb və müəssisə haqqında ətraflı məlumat verilib.

Qeyd edək ki, müəssisə 6,4 hektar sahədə yerləşir, istehsal binaları və tikililəri 12,5 min kv. m, ümumi faydalı sahəsi 30 min kv m.dir. Burada 3,5 hektar sərbəst torpaq sahəsi var ki, investorlar burada hər hansı müəssisənin tikintisini apara bilər.

Müəssisədə avadanlıqların istehsal gücü bir günə 3 növbəli iş prinsipi əsasında 8-9 ton arasındadır.

MMC-nin əsas vəsaitlərinin balans dəyəri 1 mln 608 min manatdır. Lakin qiymətləndirici təşkilatın qiymətləndirmələrindən sonra müəssisənin ilkin hərrac qiyməti müəyyən olunacaq.

“ASK Tekstil” MMC-nin nəzdində olan fabrik iplik istehsalı sahəsində pambıq olan 2 növ iplik istehsal edir, toxuma avadanlıqları vasitəsilə pambıq ipliklərindən trikotaj məhsulları, xüsusi geyimlər istehsal edilir.

Könül
Ölkə.Az