ABŞ və Suriya ordusu üz-üzə gələ bilər

Bəşər Əsəd qüvvələri bu qrupa hücum edərsə, ABŞ birbaşa Suriya ordusunu hədəf alacaq

Ölkə.Az xarici mətbuata istinadən xəbər verir ki, Ağ Ev verdiyi yeni qərarda təchizat proqramı daxilində Suriyada silahlı müxaliflərə hava dəstəyi verəcəyini bildirib.

Bəşər Əsəd qüvvələrinin bu qrupa hücum edəcəyi təqdirdə ABŞ qüvvələri Suriyada vətəndaş müharibəsi başlayandan bəri ilk dəfə birbaşa Suriya ordusunu hədəfə alacaq.

Təchizat proqramına daxil olan və "mülayim üsyançılar" adı verilən bu qrupların ilk hədəfinin İŞİD terror təşkilatı olacağı bildirilir. Amma bu qruplar təchizat proqramına daxil olmadan əvvəl Suriya ordusuna qarşı döyüşüb və həmin qrupların yenidən Suriyaya qarşı döyüşməsi istisna edilmir.

“Wall Steet Journal” qəzetinə açıqlama verən ABŞ-ın səlahiyyətli şəxsləri hava dəstəyinin ilk olaraq qrupların İŞİD mövqelərinə irəlilədiyi anda dövrəyə girəcəyini bildiriblər.

ABŞ-ın rəhbərliyi ilə İŞİD-ə qarşı yaradılan koalisiyanın Suriyada terror təşkilatına qarşı etdiyi əməliyyatların başladığı andan bu vaxta qədər Əsəd qüvvələri ABŞ ordusunu hədəf almayıb. Vaşinqtonun verdiyi son qərarla ABŞ və Suriya ordularının üz-üzə gəlməsi ehtimalı var.

“Associated Press” xəbər agentliyi ABŞ və Pentaqon(ABŞ Müdaiə Nazirliyi) hava qüvvələrinin dəyişən qaydaları ilə bağlı məlumat verməkdən imtina etdiyini bildirib.

Ölkə.Az