Qırğızıstanın AİB-ə qoşulması ratifikasiya olundu

Birliyin fəaliyyəti rəsmi olaraq 1 yanvar 2015-ci ildə başlayır

Ölkə.Az xəbər verir ki, Qazaxıstan prezidenti Nursultan Nazarbayev Qırğızıstanın Avrasiya İqtisadi Birliyinə qoşulması barədə müqaviləni ratifikasiya edib.

Sənədin mətni rəsmi KİV-lərdə yayımlanıb. Bundan əlavə, Nazarbayev Qırğızıstanın ittifaqa qoşulması ilə əlaqədar Avrasiya İqtisadi Birliyi haqqında müqaviləyə dəyişikliklərin əlavə olunmasına dair bir sıra protokolları imzalayıb.

Qazaxıstan Qırğızıstanın AİB-ə qoşulmasını ratifikasiya edən sonuncu dövlət olub. Buna qədər sənəd Ermənistan, Belarus və Rusiya tərəfindən ratifikasiya edilib.

Avrasiya İqtisadi Birliyi 29 may 2014-cü ildə Belarus, Qazaxıstan və Rusiya tərəfindən imzalanmış müqavilə ilə qurulan siyasi və iqtisadi təşkilatdır. Ermənistanı da Avrasiya İqtisadi Birliyinə daxil edən müqavilə 9 oktyabr 2014-cü ildə imzalanıb. Birliyin fəaliyyəti rəsmi olaraq 1 yanvar 2015-ci ildə başlayır.

Rəşid Mustafazadə

Ölkə.Az