Azərbaycan istəyinə nail olacaq, Kreml isə... - Erməni mətbuatı

Son iki gündə vətəndaş cəmiyyətinin və media nümayəndələrinin iştirakı ilə keçirilən aksiya erməni cəmiyyətinin və mediasının ən ciddi müzakirə etdiyi məsələdir. Artıq erməni cəmiyyəti və mediası da Azərbaycanın atdığı addımın ciddiliyinin mahiyyətini anlamaqdadırlar. Onu da anlamaqdadırlar ki, hay-küy salmalarına baxmayaraq daha əvvəlki illərdə olduğu kimi heç bir beynəlxalq güc erməni “şıltaqlığına” dəstək verib, ona həyan çıxmır və ya bu gücə qadir deyil. Ermənilər tədricən onu da dərk etməyə başlayırlar ki, onlara dəstək verib, həyan çıxanlar bütün bunları heç də erməni sevgisindən etməyiblər, məhz öz çıxarları naminə ediblər. Sonda ortada qalan ermənilər olub. O baxımdan da nə qədər gec deyil, ziyanın yarısından qayıtmaq olar və bunda bir fayda var. Çünki Azərbaycanın Ermənistanın və Qarabağdakı separatçıların “nazı ilə oynamaq”  üçün səbri sonsuz deyil. Bu “nazın” aqibəti onlara çox baha başa gələ bilər. Necə ki, 2 il öncə “dəmir yumruq” bədəlin necə ağır olduğunu başa saldı. Əgər dərs çıxartmayıblarsa, “dəmir yumruq” yerindədir, hər zaman baş qaldıranın başını əzməyə hazır vəziyyətdədir.

Lakin Azərbaycan “şıltaq”lara vəziyyəti sivil dildə başa salmağa çalışır. Onları normal dildə başa salmağa çalışır ki, sonda kimsə harayınıza yetişməyəcək. Bəzi erməni mediası da yaranmış durumu az-çox reallığa uyğun izah etməyə çalışıb. 

“Hraparak” da gedən yazıda qeyd olunur ki, bundan sonra  Qarabağı Ermənistanla birləşdirən dəhlizin fasiləsiz işləməsi sual altındadır.

“Azərbaycan tərəfinin tələbi başa düşüləndir: Drombon və Kaşin mədənlərində monitorinq aparmaq hüququna malik olmaq istəyir. Qarabağdakı ermənilər isə buna imkan verməməyə çalışır. Hələlik Rusiya sülhməramlı qüvvələri neytrallığı qorumağa və vəziyyətin nəzarətdən çıxmasına imkan verməməyə çalışır. Eyni zamanda, Rusiya tərəfi üçün vacibdir ki, bir tərəfdən sülhməramlı missiyanın həyata keçirilməsinə, digər tərəfdən isə Rusiya-Azərbaycan münasibətlərinə xələl gətircək hadisələrin olmasını istəmir. Rəsmi İrəvana gəldikdə isə heç nə edə bilməz”, - mətbu orqanı yazır.

“Hraparak” onu da qeyd edib ki, Azərbaycan tərəfi Qarabağdakı yataqlarda monitorinq aparmağa nail olacaq: “Məsələ yüksək səviyyədə həllini tapacaq. Üstəlik, tamamilə mümkündür ki, bu həll Ermənistan üçün xüsusilə əlverişli olmayacaq.

Nəhayət, unutmayaq ki, Kreml üçün Bakı Ankara ilə birlikdə anti-Rusiya sanksiyalarından yan keçmək üçün bir “pəncərədir”.  Ona görə də çətin ki, Qarabağla bağlı məsələdə hər hansı ermənipərəst həll yolunu gözləmək mümkün olsun. Bu sadəlöhvlük olardı”. 

Bu bir daha sübut edir ki, Rusiya indiki üzləşdiyi durum erməniləri dəstəkləməyə imkan vermir. Sadəcə öz maraqları üçün fayadalanmağa çalışacaq. Bu da ermənilərin xeyrinə olmayacaq.

Mürtəza
Ölkə.Az