Nazirlikdən fermerlərə tövsiyə

Kənd Təsərrüfatı Nazirliyi (KTN) fermerlərə taxıl sahələrinin biçindən sonra yandırılmasının fəsadları barəsində tövsiyə edib.

Bu barədə Ölkə.Az-a nazirlikdən bildirilib.

Nazirliyin məlumatına görə, taxıl sahələrinin biçindən sonra yandırılması torpaqda üzvi maddələrin itirilməsinə, torpaq mikroflorasının məhv edilməsinə, bütövlükdə torpaq mübitliyinin kəskin surətdə azalmasına səbəb olur.

“Samanın yandırılması nəticəsində torpağın həyat qabiliyyəti pisləşir, milyon illər ərzində formalaşmış faydalı mikroorqanizmlər məhv olur ki, onun da bərpa olunması üçün əlavə resurslar və uzun müddət tələb olunur.

1 hektar sahədə samanın yandırılması nəticəsində 40-50 kq azot, 70-80 kq fosfor, 90-100 kq-a qədər kalium elementi və 1-1,5 ton humus itirilir ki, bu itkini kompensasiya etmək üçün torpağın hər hektarına 10-15 ton həcmində üzvi gübrə verilməsi tələb olunur” - deyə, nazirlik qeyd edib.

KTN bildirib ki, eyni zamanda biçindən sonra taxıl sahələrinin yandırılması növbəti ildə həmin sahədə becəriləcək bitkilərin məhsuldarlığının 20-30% azalmasına səbəb olur.

Qeyd edilənləri nəzərə alaraq, KTN fermerlərə taxıl sahələrindən samanı yandırmadan çıxarmalarını və yaxud xırdalayaraq mulça halında əkin sahələrinə verib şum və digər torpaq becərmə əməliyyatları aparmalarını tövsiyə edib.

 Ölkə.Az