Ağ Ev İrəvanı məcburən dəstəkləyir: ABŞ-da erməni terrorizmi real təhdidə çevrilir
ABŞ-ın geopolitik hədəflərinin reallaşması baxımından, Ermənistanın Rusiya və İrandan uzaqlaşdırılması olduqca vacib faktora çevrilib... Ağ Ev strateqləri ABŞ-ın maraqlarının təmin edilməsi üçün Ermənistanın Azərbaycan və Türkiyə ilə normal münasibətlər qurmasından başqa alternativ variantın olmadığını da nəzərə alırlar...
"Ölkə.az" musavat.com-a istinadla bildirir ki, Cənubi Qafqazda sülh və sabitlik prosesi iflasa uğramaq təhlükəsi ilə üzləşib. Hazırda regional sülh prosesi demək olar ki, tamamilə arxa plana keçirilib. Və yaxın vaxtlarda sülh danışıqlarının yenidən aktivləşdiriləcəyinə yönəlik hər hansı əlamət müşahidə olunmur.
Halbuki ötən ilin əhəmiyyətli hissəsi məhz sülh prosesi ətrafında cərəyan edən hadisələrin təsiri altında keçmişdi. İlin sonlarında isə Ermənistanın bu prosesdən açıq şəkildə uzaqlaşmağa başladı və sülh danışıqları formal mövzuya çevrildi. Və belə vəziyyətdə Ermənistanla hansısa məsələnin müzakirəsi yalnız zaman itkisi xarakteri daşıyır.
Təbii ki, rəsmi İrəvan hərbi-siyasi təxribatlarına israrla davam etdikcə, Cənubi Qafqazda sülh dövrünün dayanıqlı məzmun ala biləcəyindən danışmaq da çətinləşir. Ermənistanın mövqeyi hazırda heç bir mövzuda anlaşma imkanları buraxmır. Rəsmi İrəvan normal müzakirə qabiliyyətini böyük ölçüdə itirmiş tərəf görüntüsü ilə diqqəti çəkir. Və bu, Cənubi Qafqazda yeni savaş ehtimalı yaratmaqla yanaşı, ilk növbədə elə Ermənistan üçün real təhlükə vəd edir.
Ancaq Paşinyan hakimiyyəti hələ də ənənəvi erməni zehniyyəti üzərindən "şantaj taktikası"nın hansısa nəticələr verə biləcəyinə ümid bəsləyir. Ona görə də, yalanın həqiqət kimi təqdim olunmasına çalışaraq, beynəlxalq səviyyədə süni hay-küy diplomatiyasında israrlı davranır. Halbuki, ötən əsrin şərtlərində erməni propoqandası üçün effektiv olan bu "taktika" müasir dövrdə rəsmi İrəvanın istədiyi nəticədən çox-çox uzaq qalmaqdadır. Hər halda, müasir texnoloji inkişaf indi Ermənistanın əsas düşməninə çevrilməyə başlayıb. Rəsmi İrəvanın isə artıq köhnəlib, əhəmiyyətini böyük ölçüdə itirmiş "şantaj taktikası"na başqa təsirli alternativi yoxdur.
Məsələ ondadır ki, Ermənistanın əsas beynəlxalq himayədarları belə, hazırda rəsmi İrəvanın süni "hay-küy diplomatiyası"na ehtiyatlı yanaşırlar. Ona görə də, indi rəsmi İrəvanın "timsah gözyaşları" əvvəlki kimi effektiv deyil. Xüsusilə də, böyük dövlətlərin strateji maraqlarının ciddi şəkildə dəyişdiyi və toqquşduğu bir şəraitdə Ermənistanın daim təxribat törədərək, "zərərçəkən məzlum" görkəmində qalması çətinləşib.
Bir müddət öncə rusiyalı nazir Maksim Oreşkindən ermənilərin bu "taktika"sını tam dəqiqliyi ilə təsvir etmişdi. Rus nazir bildirmişdi ki, Azərbaycan öz təhlükəsizliyini qorumağa başlayanda, ermənilər hər oyundan çıxırlar: "Ermənilər özləri təxribat törədirlər, sonra da ondan-bundan yardım istəyirlər. Azərbaycan Cənubi Qafqazın açar dövlətidir və haqqlıdır. Biz Azərbaycanla münasibətləri ermənilərə görə pozmayacağıq. Ermənistan ağlını başına yığmalıdır. Əks halda, nə Qərb, nə də bir başqası ona kömək etməyəcək”.
Təbii ki, rus nazir haqlıdır və bunu təsdiq edən kifayət qədər ciddi əlamətdir. Belə ki, erməni propoqanda mərkəzləri indi dünyanın nüfuzlu media qurumlarında öz uydurmalarını nəşr etdirməkdə də çətinlik çəkirlər. İndi bu hay-küyçü mərkəzlər daha çox ikinci-üçüncü dərəcəli media orqanları ilə kifayətlənmək məcburiyyətində qalıblar. Hətta erməni diaspor təşkilatlarının parası da bu məsələdə əvvəlki kimi təsvir göstərə bilmir.
Bunun əksinə olaraq, dünyanın bir sıra nüfuzlu media qurumları daha çox erməni terrorizmini ön plana çıxartmağa çalışırlar və bunun olduqca təhlükəli faktorlardan biri olduğunu qabardırlar. ABŞ-da nəşr olunan dünyaca ünlü "National Interest" jurnalı erməni terrorizminin tarixi və onun müasir dövrdəki nəticələrini açmaqda davam edir. Və ABŞ siyasi dairələrini bu erməni terrorizminin doğurduğu təhlükəni diqqətdən kənarda qoymamağa çağırır.
"National Interest" jurnalı hesab edir ki, ABŞ siyasi dairələri və hüquq-mühafizə orqanları erməni terrorizminin Avropa və Yaxın Şərqdə törətdiyi təxribatları nəzərdən qaçırtmamalıdır: "Bir müddət öncə Vaşinqtonda törədilmiş silahlı insident isə ABŞ-ın da bu təhlükədən sığortalanmadlğını göstərir. Çünki həmin hadisə erməni terrorizminin növbəti örnəyidir. Unutmaq olmaz ki, Azərbaycanın Los-Ancelesdəki konsulluğu son vaxtlar erməni təşkilatları tərəfindən davamlı olaraq, təhdid edilir".
"National Interest" jurnalının analitikləri əmindirlər ki, Ağ Ev erməni terrorizminin doğurduğu təhlükəni diqqətdə saxlamaqla yanaşı, ABŞ-ın Ermənistanı Rusiyanın təsir dairəsindən qopartmaq siyasətini də davam etdirməlidir. Eyni zamanda, Ermənistanın İranın təsiri altına düşməsinə də qətiyyən imkan vermək olmaz: "Bu, ümumilikdə Ermənistan əhalisinin maraqlarına da tamamilə sərfəli olan siyasi xətdir. Deməli, buna nail olmaq üçün Ermənistan və Azərbaycan arasında rəsmi, davamlı sülhün bərqərar olmasına çalışmaq indi daha çox vacibdir. Çünki bu problem həll edilərsə, ardınca Türkiyə-Ermənistan münasibətləri də sürətlə normallaşdırılma mərhələsinə keçə bilər. Halbuki məhz belə möhkəm sülh şəraitinin yaradılmasına erməni ekstremistlər bütün mümkün vasitələrlə əngəl törətməyə çalışırlar".
Göründüyü kimi, ABŞ Ermənistanı əslində, məcburən dəstəkləyir. Ağ Ev daha çox ABŞ-ın geopolitik hədəflərini reallaşdırmağa çalışır. Bu hədəflərin reallaşması üçün isə Ermənistanın Rusiya və İrandan uzaqlaşması olduqca vacibdir. Ona görə də, Ağ Evin maraqları Ermənistanın Azərbaycan və Türkiyə ilə normal münasibətlər qurmasını tələb edir. Çünki əks halda, Ermənistanın Rusiya və İrandan uzaqlaşdırılması demək olar ki, mümkün deyil.
Belə vəziyyətdə isə erməni propoqanda mexanizmlərinin beynəlxalq ictimaiyyəti çaşdırmaq və aldatmaq imkanları ciddi şəkildə məhdudlaşmağa başlayıb. İndi dünyanın nəhəng dövlətlərinin maraqları da fərqli hədəflərə indeksləşdiyindən Ermənistanın ötən əsrə aid metodlar üzərindən manevrlər etməsi çətinləşib. Daha "şikayət diplomatiyası" ilə dünyanı aldatmaq cəhdləri işə demək olar ki, yaramır. Və yalanı, şantajı reallıqdan ayırd etməyə imkan verən müasir mexanizmlər daha ön plandadır, daha effektiv təsirə malikdir.
Digər tərəfdən, son vaxtlar erməni diaspor təşkilatlarının təsiri altında olan siyasətçilərin də sıraları sürətlə seyrəlir. Onlardan bəziləri öz reputasiyalarını qorumaq məcburiyyətində qalıblar. Bəziləri isə müxtəlif korrupsiya cinayətlərində suçlanaraq, həm nüfuzlarını, həm də siyasi elitadakı mövqelərini itirirlər. ABŞ Konqresinin Nümayəndələr Palatasında uzun illər spiker postunda fəaliyyət göstərmiş ermənipərəst Nensi Pelosinin kənarda qalması, Avropa Parlamentinin Ermənistanı dəstəkləyən rəhbər şəxslərinin korrupsiyada suçlanaraq, həbs edilməsi buna örnək sayıla bilər.
