"Gülənçi" prokurorlar Türkiyədən qaçdı

"Ergenekon" və "yolsuzluq dosyası"nın prokurorları Türkiyədən qaçdı.

Türkiyə Baş Prokurorluğunun mühüm işlər üzrə keçmiş prokurorları ölkədən qaçıblar.

Ölkə.az türk mediasına istinadən xəbər verir ki, Zəkəriyyə Öz və Cəlal Qara ölkədən qaçıblar.

Yayılan məlumata görə, dünən İstanbulun Bakırköy 2-ci Ağır Cəza Məhkəməsi "Ergenekon" işini aparan iki prokurorun həbsinə sanksiya verib. Bu gün məhkəmənin qərarını icra etmək istəyən orqanlara məlum olub ki, Zəkəriyyə Öz və Cəlal Qara bir neçə gün əvvəl Gürcüstana qaçıblar. Məlumatı Gürcüstanla sərhəddəki artvin valiliyi və Batum polisi də təsdiq edib.

Xatırladırıq ki, "Ergenekon" işindən əlavə keçən ilin dekabr ayında Türkiyədə başlamış "yolsuzluq qalmaqalı"nda Zəkəriyyə Öz və Cəlal Qara baş rolda idilər. Başda Türkiyənin dörd nazirinin də adı keçdiyi, iranlı biznesmen Rza Zərrab, Türkiyənin ən böyük banklarından biri "Halkbank"ın rəhbəri və digərlərinin cinayət işini də məhz bu prokurorlar araşdırmışdı. Rəsmi dairələrin "paralel dövlət", yəni Gülən camaatının üzvləri olduğunu iddia etdiyi prokurorlar AKP hökumətinə qarşı gizli fəaliyyətdə ittiham olunurlar. Belə ki, Türkiyənin daxili işlər və sənaye nazirlərinin oğullarının da qarışdığı İrana nəğd xarici valyuta transferi əməliyyatının üstü məhz Zəkəriyyə Öz və Cəlal Qara tərəfindən açılmışdı.

Türkiyə hökuməti isə adı çəkilən prokurorları rəhbərliyə raport vermədən bu əməliyyatı həyata keçirdiklərinə görə, "dövlətin təməllərinə zərbə vurmaq məqsədi ilə təşkilat qurmaqda" ittiham edərək öncə vəzifələrindən azad etmişdi, indi isə həmin prokurorların həbslərinə qərar verilib.

"Paralel dövlət"ə işləməkdə ittiham edilən Zəkəriyyə Öz və Cəlal Qaranın beynəlxalq axtarışa veriləcəkləri gözlənilir.

Ölkə.az