"Qəbələ"nin Cavid Hüseynov susqunluğu

Xəbər verdiyimiz kimi "Qəbələ" futbol klubunun sabiq kapitanı Cavid Hüseynov jurnalist Rasim Əliyevin qətlinə görə həbs edilib.

"Qəbələ" klubu Cavid Hüseynovun həbsdən çıxmasını gözləyəcək, yoxsa futbolçunun müqaviləsini ləğv edəcək? Bu sual artıq hər kəsi düşündürür.

Futbolçunun həbsindən sonra "Qəbələ" klubunun hansı addım atacağı böyük maraqla gözlənilir. Ancaq klub rəhbərliyi hələ bu haqda açıqlama vermir. Hətta bir neçə gün öncə "Qəbələ" futbol klubunun vitse-prezidenti Fariz Nəcəfov deyib ki, səbirsizliklə Cavid Hüseynovun meydana qayıdacağı günü gözləyirik.

Cavid Hüseynovun həbsindən sonra klubun hansı addım atacağını öyrənmək üçün "Qəbələ" futbol klubunun mətbuat xidmətinin rəhbəri Anar Hacıyevlə əlaqə yaratdıq.

Anar Hacıyev Ölkə.az-a bildirdi ki, Cavid Hüseynov haqqında heç bir açıqlama olmayacaq.

"Qəbələ" futbol klubunun mətbuat xidmətinin rəhbəri komanda haqqında bütün suallara cavab verə biləcəyini, ancaq Cavid Hüseynov haqqında danışmayacağını dedi.

Səxavət Məmməd
Ölkə.az