“Mümkün olası iş deyil...”
Daxili İşlər Nazirliyi şikayətçi vətəndaş Əmrah Sarıyevin ittihamlarına cavab verib.
Sözügedən şəxs bir müddət əvvəl mətbuata müraciət edərək oğlu Raqib Sarıyevə qarşı törədilən cinayətin polis orqanları tərəfindən gizlədildiyindən şikayət edib. Oğlu bıçaqlanan Əmrah Sarıyevin sözlərinə görə, polis idarəsi məsələ ilə bağlı cinayəti açıb, cinayəti törədənlərlə bağlı tədbir görmək əvəzinə, işi ört-basdır etməklə məşğul olub.
DİN Mətbuat Xidmətinin rəis müavini Ehsan Zahidov bununla bağlı məsələyə münasibət bildirib:
“Bəli, iyulun 18-də gecə saat 03.30 radələrində Şamaxı şəhər sakini Raqib Sarıyev qohumları Seymur və Taleh Eyvazovlar tərəfindən döyülməsi nəticəsində sağlamlığına yüngül zərər vurmaya xas olan bədən xəsarətləri alaraq xəstəxanaya yerləşdirilib. Şamaxı RPŞ-də müvafiq araşdırmalar aparıldıqdan, zərərçəkmişin və hadisəni törətməkdə təqsirli bilinən şəxslərin izahatları alındıqdan sonra fakt üzrə CM-nin 128-ci maddəsi ilə cinayət işi başlanılıb və Raqib Sarıyev iş üzrə zərərçəkmiş şəxs kimi tanınıb. Hazırda cinayət işi üzrə istintaq davam etdirilir”.
DİN rəsmisi atanın “ört-basdır ittihamları”na isə belə cavab verib:
“O ki, qaldı guya təqsirləndirilən şəxslərin RPŞ-də himayə edilməsinə və ya rəisin guya cinayəti ört-basdır etməsinə, bunlar hamısı əsassız fikirlərdir. Bir halda ki, qanuna müvafiq olaraq fakta görə cinayət işi qaldırılıbsa, bu iş icraata verilibsə, bu cinayəti necə ört-basdır etmək olar? Mümkün olası iş deyil... İstintaq başa çatandan sonra işə hüquqi qiymət veriləcəkdir”.
Xatırladaq ki, zərərçəkmişin valideynləri bıçaqlanma hadisəsinə laqeydliklə bağlı prezident İlham Əliyevə, baş prokuror Zakir Qaralova və daxili işlər naziri Ramil Usubova müraciət ünvanlayıblar. Onlar oğullarına qarşı soyuq silahdan istifadə edərək onu öldürmək istəyən şəxslərin barəsində ciddi tədbir görülməsini, işin Şamaxı rayon Polis İdarəsinin icraatından alınıb, müvafiq orqanlara verilməsi üçün aidiyyatı qurumlara göstəriş verilməsini istəyiblər.
Ölkə.Az
