Hüquqşünas: "Onda dəqiq biləcəyik ki, Cavid Hüseynovun bu cinayətdə iştirakı nədən ibarətdir"

Bu gün Cavid Hüseynov ilə bağlı appelyasiya şikayətinə baxılacaq

Xəbər yayılıb ki, "Qəbələ" klubu girov qarşılığında Cavid Hüseynovu həbsdən çıxarmaq istəyir.

Cəmiyyətdə Cavid Hüseynova qarşı irəli sürülən ittiham birmənalı qarşılanmayıb. Böyük əksəriyyət futbolçuya qarşı irəli sürülən ittihamın yüngül olduğunu iddia edir.

"Qəbələ" klubunun futbolçusu Cavid Hüseynovun həbsi məsələsinə və ümumiyyətlə hadisəyə Müsavat Partiyası başqanının müavini, hüquqşünas Elman Fəttah Ölkə.az-a verdiyi açıqlamasında münasibət bildirib.

Elman Fəttah: "Həbs qətimkan tədbiri haqqında qərar girov qarşılığında dəyişdirilə bilər. Bu, qanunun icazə verdiyi məsələdir, ancaq təəssüflər olsun ki, Azərbaycan qanunvericiliyində, hüquq sistemində demək olar ki, tətbiq edilməyən bir üsuldur. Xüsusilə də, Cavid Hüseynova qarşı irəli sürülmüş ittiham tamamilə yüngül ittihamlara aiddir, hansı ki, əslində hüquqi baxımdan onun istintaq dövründəki qətimkan tədbiri heç də həbslə olmamalı idi. Bu işin birinci tərəfi.

İşin ikinci tərəfi, hadisənin baş verməsi ilə bağlı ictimayyətə geniş şəkildə verilən məlumatlara əsasən böyük əksəriyyət inanır ki, döyülmə məsələsində Cavidin iştirakı mütləq olub. Cavid bu məsələdə ya təşkilatçı kimi, ya da bu işin təhrikçisi kimi cinayətin iştirakçısıdır. İlk baxışda ona cinayəti bilib gizlətmə ittihamını, yəni, daha yüngül bir cinayət maddəsinin irəli sürülməsi müəyyən qədər şübhələr yaradır. Ona qarşı irəli sürülən ittiham ən azı təhrikçi və yaxud təşkilatçı kimi sürülməli idi. Bu da çox ciddi bir ağır cinayət kateqoriyasına aiddir. Hazırda gözləmək lazımdır ki, zərər çəkənin vəkilləri və yaxud istintaq qurumları məhkəməyə hansı sübutları təqdim edəcəklər. Onda dəqiq biləcəyik ki, Cavid Hüseynovun bu cinayətdə iştirakı nədən ibarətdir. Cavid Hüseynovun vəkili vasitəsi ilə verdiyi açıqlamada, guya bibisi oğluna mesaj göndərdiyi və həmin mesajda bu məsələyə qarşı olduğunu bildirir və iddia edir ki, hadisə ondan xəbərsiz törədilib. Bu sübut olunarsa və yaxud əksinə ictimayyətdə çoxlarının inandığı versiya, yəni bu işi Cavidin təşkil etdiyi ortaya çıxarsa, Cavid Hüseynova qarşı yeni ittihamlar irəli sürülməlidir, cəzası daha da ağırlaşdırılmalıdır".

Səxavət Məmməd
Ölkə.az