Böyükağa Hacıyevdən "Qəbələ" - "Panatinaikos" oyununa "Türkiyə bayraqlı" çağırışa

Bu, onların savadsızlığından irəli gəlir

Bu sözləri Ölkə.Az saytına açıqlamasında əməkdar məşqçi Böyükağa Hacıyev "Qəbələ" futbol klubunun hazırda həbsdə olan oyunçusu Cavid Hüseynovun "Apollon"la oyundan sonra meydanda Türkiyə bayrağı ilə dövrə vurmasına, həmçinin sosial şəbəkələrdə bir qrup insanın avqustun 20-də Bakıda baş tutacaq Avroliqanın pley-off mərhələsinin ilk oyunu çərçivəsində keçiriləcək "Qəbələ" - "Panatinaikos" matçında azarkeş tribunasına Türkiyə bayraqları ilə çıxma çağırışına münasibət bildirərkən qeyd edib:

"Birinci növbədə evin içi, sonra eşiyi. Bunu unutmaq olmaz. İlk növbədə öz bayrağımızı qaldırmalı, ona sahib çıxmalıyıq. Bəli, türklər də bizim qardaşlarımızdır. Ancaq Azərbaycan bayrağını bir tərəfə atasan, əlində Türkiyə bayrağı ilə dövrə vurasan. Sən Türkiyənin yox, Azərbaycanın vətəndaşısan. Bu, çox ciddi və həssas məsələdir. Həmişə demişik ki, türklər bizim qardaşlarımızdır. Bu o demək deyil ki, Azərbaycanı danasan, aşağılıq göstərəsən. Niyə? Bir daha deyirəm ki, bunu idmançılarımız bilərəkdən eləmir, savadsızlıqdan edirlər".

Qeyd edək ki, Səbail Rayon Məhkəməsinin Cavid Hüseynov barədə çıxardığı 3 aylıq həbs qətimkan qərarı bu gün Bakı Apelyasiya Məhkəməsi tərəfindən qüvvədə saxlanılıb. Mərhum jurnalist Rasim Əliyevin ölümündə adı hallanan futbolçu Cinayət Məcəlləsinin 307.1 (ağır cinayətin hazırlanmasını və ya törədilməsini bilərək həmin cinayət barəsində xəbər verməmə) və 307.2-ci (qabaqcadan vəd etmədən ağır cinayəti gizlətmə) maddələri ilə ittiham olunur.

Ölkə.az