"Qəbələ"nin Avroliqa oyununda "bayraqlı" təxribat hazırlanır?

"Qəbələ" klubunun azarkeşlərinin komandanın gələcək oyunlarında stadiona türk bayraqları ilə girəcəkləri haqda sosial şəbəkədə xəbərlər yayılmağa başladı.

Xatırladırıq ki, son günlərin qalmaqallarına mövzu olan "Qəbələ" futbol klubunun kapitanı Cavid Hüseynov Kipr komandası ilə oyundan sonra meydançada Türkiyə bayrağı ilə dövrə vurmuşdu. Bu hadisə komandaların Qəbələdəki oyunu zamanı baş vermişdi.

Oyundan bir neçə gün sonra isə həmin futbolçunun adı bütün kriminal xronikaların başında gəlməyə başladı. Tanınmış jurnalist Rasim Əliyevin döyülərək öldürüldüyü cinayət hadisəsinə "Qəbələ" klubunun kapitanı, meydançada türk bayrağı ilə dövrə vuran Cavid Hüseynovun adı qarışınca klub ətrafında da böyük qalmaqal yarandı.

Baş verən cinayət nəticəsində bir ailə öz övladını itirərək gözü yaşlı, "Qəbələ" klubu isə kapitansız qalsı. Rasim Əliyevin cinayət işi çərçivəsində klubun kapitanı Cavid Hüseynov həbs edildi. Bu, onun idman karyerası ilə yanaşı demək olar ki, həyatdakı bütün yollarını bağladı. Hisslərə qapılaraq bir tənqidi söz üstündə bir insanı ölənə qədər döymək və ya döydürmək onu göstərdi ki, idmançı kimi hansı mərtəbəyə yüksəlirsən yüksəl, öncə insan olmalı, insani keyfiyyətlərə sahib olmalısan.

Cəmiyyətin müxtəlif təbəqələrinin bu hadsəyə münasibəti birmənalı oldu. Cinayət hadisəsi ölkənin birinci şəxsi tərəfindən ciddi şəkildə qınandı və hər kəs gühankarların cəzalanması üçün ölkə rəhbəri iradəsini ortaya qoydu. Hazırda başda "Qəbələ" klubunun kapitanı Cavid Hüseynov olmaqla Rasim Əliyev cinayətinin bütün fiqurantları, 6 nəfər həbs olunublar. Onlara qarşı Azərbaycan Respublikası cinayət məcəlləsinin bir neçə maddəsi ilə ittiham irəli sürülüb. Bu gün məhkəmə Cavid Hüseynovun vəkilinin onun haqqında seçilmiş həbs qətimkan tədbirinin ləğvi haqda vəsatətini qəbul etməyərək onun həbsdə qalmasına qərar verdi.

İctimaiyyəti artıq bir həftədən çoxdur ki, narahatlıq içərisində saxlayan bu hadisələrin fonunda "Qəbələ" futbol klubunun bəzi "azarkeşlərinin" sosial şəbəkələrdə başladığı kampaniya sözün əsl mənasında hələ də aramızda belə ünsürlərin olduğuna görə bütün sağlam düşüncəli vətəndaşlarımızı təəssüf hissləri keçirməyə vadar etdi.

Adı qalmaqallarda hallanan klubun bəzi azarkeşlərinin oyunlar zamanı Türkiyə bayrağı dalğalandırmaq təklifləri həm də bir az qəribə səslənir.

Görəsən Azərbaycan bayrağına qıtlıq mövcuddur? Niyə öz komandalarımızın oyunlarında öz bayraqlarımız dalğalandırılmır? Cavid Hüseynovun yunanlara acıq verirmiş kimi oyundan sonra onların qarşısında türk bayrağı dalğalandırması türk mediasında sadəcə qısamüddətli bir ajiota səbəb oldu və həmin günün sonunda artıq bu xəbər unuduldu. Hətta bu hadisəni Türkiyəniin əksər nüfuzlu media orqanları heç tirajlamadılar belə. Bizə qalan bizim "qardaş çılğınlığımız" oldu. Təbii yunanlardan gələcəkdə adekvat addımlar gözləməliyik. Məsələn hansısa yunan komandasının Qarabağa gəlib separatçılarla futbol oynaması, çempionat keçirməsi onda gərək bizi təəccübləndirməsin. Yunanısan çox da kiçik ölkə deyil. Böhranla boğuşsa da, dünyanın ən qədim mədəniyyıtlərindən birinin beşiyi kimi dünyanın diqqət mərkəzindədir. Sabah eyni şeyi, məsələn yunan komandalarından biri ilə oyun zamanı yunan futbolçunun erməni separatçılarının bayrağına bütünərək meydanda qaçmasını görək necə həzm edəcəyik.

Ölkəmizin əsl vətəndaşları, vətənpərvərləri olaraq unutmamalıyıq ki, Türkiyə qardaş ölkədir, amma onu da unutmamalıyıq ki, Azərbaycan müstəqil dövlətdir və bu müstəqilliyimiz xalqımıza onminlərlə insanımızın qanı bahasına başa gəlib. İlk düşünəcəyimiz şey bu olmalıdır. Unutmamalıyıq ki, Türkiyə özü böyük dövlətdir və öz maraqlarını özü qorumağı yaxşı bacarır. Bizim futbolçularımızın və onların bəzi yetişməmiş azarkeşlərinin köməyinə də möhtac deyil. Bu gün bəzi küt zəkalı, dar düşüncəli uşuqların sosial şəbəkələrdə düşmənlərimizin əlinə bizə hücum üçün əsas verməsinə göz yuma bilmərik. Cahilliyin cəngindəki azarkeşlər ordusunun xasiyyətnamələrini isə hamı gözəl bilir. Maçlar, qitə və dünya çempionatları zamanı, bu mərasimlərin keçirildiyi şəhərlərdə aqressiv şizofren kütləsi kimi törətdikləri iğtişaşlarla artıq dövlətlərin xüsusi xidmət orqanlarının diqqət mərkəzinə çevrilib. Bu neqativ halın qarşısını heç olmasa sosial şəbəkədə almaq hər fəal vətəndaşın vətəndaşlıq borcudur. Gəlin cəmiyyətimizi belə ünsürlərdən təmizləyək ki, gələcəkdə dövlətçiliyimizə qarşı təhlükəyə çevrilməsinlər.

Ölkə.Az, analitika şöbəsi