Həftənin icmalı
Döyülərək öldürülmüş jurnalisti əməliyyat edən həkim istintaqa cəlb olundu
10.08.2015
Bakıda bir qrup şəxs tərəfindən döyülərək ağır bədən xəsarətləri alan və 1 saylı Kliniki Tibbi Mərkəzdə ölən jurnalist Rasim Əliyevin əməliyyatını professor Saday Əliyev həyata keçirib.
Ölkə.Az xəbər veirr ki, bu barədə "Report"a Tibbi Mərkəzin baş həkiminin müavini Adil Salahov məlumat verib.
Jurnalistin əməliyyatında iştirak edən həkim heyəti, o cümlədən professor Saday Əliyev istintaqa cəlb olunub. Belə ki, Bakı şəhər Prokurorluğunun müstəntiqi həkim heyətindən izahat alıb.
Professor Saday Əliyev "Report"a açıqlamasında müstəntiq tərəfindən dindirildiyini təsdiqləyib.
Səhiyyə Nazirliyi araşdırmaya başladı
10.08.2015
Jurnalist Əliyev Rasimin ölümünün səbəbləri Səhiyyə Nazirliyinin Məhkəmə-Tibbi Ekspertiza və Patoloji Anatomiya birliyinin mütəxəssisləri tərəfindən araşdırılır.
Ölkə.Az bu barədə Oxu.Az-a Səhiyyə Nazirliyinin mətbuat xidmətinin rəhbəri Liya Bayramova bildirib.
Liya Bayramova qeyd edib ki, yekun məlumat müayinənin nəticələrindən sonra müəyyənləşəcək.
Qeyd edək ki, avqustun 8-də saat 18 radələrində Bakı şəhər sakini, 1984-cü il təvəllüdlü Əliyev Rasim Məmmədəli oğlu Səbail rayonu, Bayıl qəsəbəsi ərazisində fəaliyyət göstərən "Bayıl market" mağazasının qarşısında bir qrup naməlum şəxslər tərəfindən döyülərək çoxsaylı bədən xəsarətləri ilə Kliniki Tibbi Mərkəzə yerləşdirilib və aldığı xəsarətlərdən avqustun 9-da saat 05 radələrində orada vəfat edib.
Azərbaycanda IV Moto Festival başlayır
10.08.2015
Azərbaycanın ən qədim şəhəri yenidən öz qapılarını dünyanın dörd bir yanından gələn baykerlərin üzünə açır.
28-30 avqust tarixlərində Şəkidə IV Beynəlxalq Qafqaz Moto festivalı baş tutacaq.
Festival “Harley Davidson” “Baku HOG Azerbaijan”, Şəki İcra Hakimiyyəti, Mədəniyyət və Turizm Nazirliyi, Gənclər və İdman Nazirliyi və Çingiz Mustafayev Fondunun təşkilatçılığı ilə baş tutacaq.
Azərbaycanlılar uşaqlarına Vor, Xiyarə, Cinayətkar adı qoya bilməyəcəklər
10.08.2015
Nazirlər Kabineti yanında Terminologiya Komissiyası Azərbaycanda uşaqlara qoyulan adların siyahısını hazırlayıb.
Ölkə.Az xəbər verir ki, bu barədə “Report”a komissiyanın sədr müavini Sayalı Sadıqova məlumat verib.
O bildirib ki, adlar siyahısına AMEA-nın Dil Komissiyası baxandan sonra ictimaiyyətə açıqlanacaq:
“Mövcud siyahı Ədliyyə Nazirliyindən alınıb. Belə ki, hər gün yeni adlar qoyulur və bu yeni adlar Ədliyyə Nazirliyində qeydiyyatdan keçir. Sentyabr ayında siyahı AMEA-nın Dil Komissiyasına baxış üçün veriləcək. Komissiyanın təsdiqindən sonra siyahı Ədliyyə Nazirliyinə qaytarılacaq”.
Ədliyyə Nazirliyindən Terminologiya Komissiyasına təqdim olunan siyahıya yenidən baxış keçirilib və anlaşılmaz olan, eyni zamanda gülüş doğuran adlar siyahıdan çıxarılıb:
“Araşdırmalardan sonra Kəsdim, Vor, Cinayətkar, Şüşəbənd, Stəkan, Xiyarə, Portağal, Limonə, Ansambl və başqa adlar siyahıdan çıxarıldı. Xiyarə adı qərb bölgəsində 4-5 qıza qoyulub. Kövsarə adı nisbətən anlaşıldığı üçün onu siyahıdan çıxarmadıq”.
Göygölə artıq hamı gedə bilər, amma... — Rəsmi açıqlama
10.08.2015
Bakı üçün Qız qalası hansı statusu daşıyırsa, Göygöl də Gəncəbasar zonası üçün tarixi simvoldur. Göygöl Milli Parkını artıq hər bir azərbaycanlı ziyarət edə bilər.
Ekologiya və Təbii Sərvətlər Nazirliyinin (ETSN) Bioloji müxtəlifliyin qorunması və xüsusi mühafizə olunan təbiət ərazilərinin inkişafı departamentinin direktor müavini Hikmət Əlizadə açıqlamasında bildirib ki, 1990-cı illər, eyni zamanda 2000-ci illərin əvvəllərində Göygöl ətrafında xaos hökm sürüb və bu təbiət obyekti pis şəkildə istismar olunub. Onun sözlərinə görə, bura tənzim olunmayan qaydada insanlar gəlib, göl ətrafında kef məclisləri qurub, ətrafı zibilləyib, tonqal qalayıb, meşələri qırıb, suyu çirkləndiriblər:
“Bu səbəbdən 2008-ci ildə Göygöl Milli Parkı yarandı. Ekologiya və Təbii Sərvətklər Nazirliyinin əsas funksiyası Göygölü mühafizə etmək olub və bu gün də o funksiyanı daşıyır. Mühafizə, təbiəti bərpa etmək, göldə, meşələrdə bərpa prosesinin getməsi üçün bir müddət parka giriş məhdudlaşdırıldı. Bu müddət ərzində Göygöldə elmi-tədqiqat işləri də aparıldı, eyni zamanda təbii bərpa prosesi də getdi”.
"Skype", "Facebook", “WhatsApp" Azərbayacanı tərk edə bilər
10.08.2015
Azərbaycanda internet üzərində nəzarət gücləndirilir. Rabitə və Yüksək Texnologiyalar naziri Əli Abbasov jurnalistlərə açıqlamasında bildirib ki, rabitə xidmətləri göstərən "Skype", "Facebook" , “WhatsApp" lisenziyalaşdırılmalıdır:
“Azərbaycanda fəaliyyət göstərən rabitə xidmətlərinin bir neçəsi lisenziyalaşdırılmış xidmətlərdir. Hesab edirik ki, bu rabitə xidmətlərini göstərən "Skype", "Facebook" , “WhatsApp" da lisenziyalaşdırılmalıdır. Lisenziyalaşdırma istifadəçilər üçün heç bir problem yaratmayacaq. Ancaq tənzimləyici orqanlarla həmin şirkətlər arasında müqavilələr imzalanacaq”.
Mikayıl Cabbarov qızıl medal payladı
11.08.2015
Təhsil Nazirliyi 2014-2015-ci tədris ilinin yekunlarına görə ümumi təhsili xüsusi nailiyyətlərlə başa vuran 131 nəfəri qızıl, 21 nəfəri gümüş medalla təltif edib
Ölkə.Az Təhsil Nazirliyinin məlumatına istinadla xəbər verir ki, qızıl və gümüş medal alanların 69 nəfəri Bakı, 83 nəfəri isə bölgə məktəblərini təmsil edir. Onların 135 nəfəri dövlət, 17 nəfəri özəl məktəblərdə təhsil alıb. Qızıl medal sahiblərinin 75 nəfəri oğlan, 77 nəfəri qızdır.
Medala namizədlər Nazirlər Kabinetinin “Ümumi təhsili xüsusi nailiyyətlərlə başa vuran məzunların qızıl və ya gümüş medalla təltif olunma Qaydası”na uyğun olaraq müəyyənləşdirilib.
Azərbaycan prezidenti Cəlilabadda bir sıra obyektlərdə olub
11.08.2015
Dövlət başçısı Göytəpə şəhərində Heydər Əliyev adına park-bulvarın açılışında iştirak edib.
Azərbaycan prezidenti İlham Əliyev Cəlilabad rayonunun Göytəpə şəhərinin mərkəzində, Göytəpə çayının sahilində inşa edilmiş Heydər Əliyev adına park-bulvarın açılışında iştirak edib.
Park-bulvarın ərazisində ümummilli lider Heydər Əliyevin bürüncdən abidəsi ucaldılıb.
Ərazinin genişləndirilməsi və abadlaşdırılması məqsədilə burada qəza vəziyyətində olan beşmənzilli kommunal yaşayış binası, 69 saylı Cəlilabad-Biləsuvar-Masallı seçki dairəsinin inzibati binası və Göytəpə bələdiyyəsinin yerləşdiyi bina sökülərək başqa ərazidə əvəzi ödənilməklə yeni layihə əsasında tikilir. Bərbad vəziyyətdə olan Göytəpə şəhər xəstəxanası də başqa əraziyə köçürülür.
Bakı Teleqülləsinin təhlükəsizliyi gücləndirildi
11.08.2015
Azərbaycan Rabitə və Yüksək Texnologiyalar Nazirliyi “Teleradio” İstehsalat Birliyi (İB) Bakı Teleqüllə Kompleksini 24 saatlıq videonəzarət sistemi ilə təmin edib.
Ölkə.Az xəbər verir ki, bu barədə İB-nin saytında məlumat yayılıb.
Məlumatda bildirilir ki, nəzarətin təmin olunması üçün monitorinq sistemi quraşdırılıb və istismara verilib. Bununla da, Bakı Teleqüllə Kompleksinin istənilən nöqtəsində baş verəcək yanğın hadisəsini gözlə təyin etmək və qarşısını dərhal almaq mümkün olacaq.
Ölən jurnalistin işi ilə bağlı 6 nəfər həbs edildi — RƏSMİ
11.08.2015
Azərbaycanın Daxili İşlər Nazirliyi və Respublika Baş Prokurorluğu jurnalist Rasim Əliyevin döyülməsi və aldığı xəsarətlərdən dünyasını dəyişməsi barədə birgə məlumat yayıblar.
DİN-dən Ölkə.Az-a daxil olan məlumatda bildirilir:
Xəbər verildiyi kimi, avqustun 8-də Bakı şəhər sakini Əliyev Rasim Məmmədəli oğlu paytaxtın Bayıl qəsəbəsi ərazisində bir qrup naməlum şəxs tərəfindən döyülərək çoxsaylı bədən xəsarətləri ilə Kliniki Tibbi Mərkəzə yerləşdirilmiş və avqustun 9-da orada vəfat edib.
Fakt üzrə Bakı şəhər Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma, zərərçəkmiş şəxsin ölümünə səbəb olduqda) maddəsi ilə cinayət işi başlanılaraq prokurorluq və polis əməkdaşlarından ibarət istintaq-əməliyyat qrupu yaradılmışdır.
Futbolçu Cavid Hüseynovun həbsindən apellyasiya şikayəti verildi
12.08.2015
Futbolçu Cavid Hüseynov barəsində seçilmiş həbs qərarından apellyasiya şikayəti verilib.
Ölkə.Az xəbər verir ki, bu barədə APA-ya təqsirləndirilən şəxsin vəkili Adəm Məmmədov məlumat verib. Onun sözlərinə görə, Səbail rayon Məhkəməsinin C. Hüseynov barəsində ötən gün çıxardığı qərardan bu gün apellyasiya şikayəti verilib. Onlar birinci instansiya məhkəməsinin çıxardığı qərarın ləğv olunmasını və təqsirləndirilən şəxs barəsində seçilmiş tədbirin dəyişdirilməsini istəyir.
DİN deputat köməkçisinin ölümü ilə bağlı məlumat yaydı
12.08.2015
Daxili İşlər Nazirliyi deputat Fəzail Ağamalının köməkçisinin ölümü ilə nəticələnən yol-nəqliyyat hadisəsi ilə bağlı məlumat yayıb.
Ölkə.Az-ın nazirliyin saytına istinadən verdiyi məlumata görə, avqustun 11-də saat 11 radələrində Salyan rayonunun Xıdırlı kəndində Neftçala rayon sakinləri Əli Rəsulovun idarə etdiyi “QAZ-3302” (yük) və Ulduz Sadıqovun idarə etdiyi “Opel” markalı avtomobillər toqquşub.
Nəticədə U.Sadıqovun sərnişinlərindən Həsənbala Həsənov hadisə yerində ölüb, digər 2 sərnişin xəstəxanaya yerləşdirilib.
Faktla bağlı Baş Dövlət Yol Polisi İdarəsi tərəfindən araşdırma aparılır.
Qeyd edək ki, qəzada dünyasını dəyişən H.Həsənov deputat F.Ağamalının köməkçisi olub.
Təhsil Nazirliyindən diplomlarla bağlı yaranan anlaşılmazlıqlara — Açıqlama
12.08.2015
Azərbaycan Təhsil Nazirliyi (TN) ölkənin ali məktəbləri tərəfindən verilmiş hər hansı diplomun dövlət nümunəli olub-olmaması, onun həqiqiliyinin yoxlanılması ilə bağlı yaranan anlaşılmazlıqlara aydınlıq gətirib.
Ölkə.Az xəbər verir ki, Təhsil Nazirliyinin məxfi və dövlət nümunəli sənədlərlə iş sektorunun müdiri Rasim Verdiyev Trend-ə bildirib ki, son vaxtlar TN-yə diplomların dövlət nümunəli olub-olmaması və həqiqiliyi ilə bağlı tez-tez sorğular daxil olur və bəzən bu məsələlərlə bağlı müəyyən caşqınlıqlar yaranır.
Nazirlik rəsmisi bildirib ki, Azərbaycanda 1998-ci ilədək həmin dövrün qanunvericiliyinə uyğun olaraq, TN-dən başqa digər müəssisələr, əsasən də özəl ali məktəblər özləri diplom sifariş edərək hazırlatdırıblar. və məzunlarına veriblər.
İxtisas seçiminin nəticələri elan olundu
12.08.2015
Tələbə Qəbulu üzrə Dövlət Komissiyası (TQDK) 2015/2016-cı tədris ili üçün Azərbaycan Respublikasının ali təhsil müəssisələrinə yerləşdirmənin nəticələrini elan edib.
TQDK-dan Ölkə.Az-a verilən xəbərə görə, abituriyentlər müsabiqənin nəticələrini TQDK-nın internet səhifəsindən və ya mobil telefonla iş nömrələrini 7727 nömrəsinə göndərməklə öyrənə bilərlər.
Ali təhsil müəssisələrinə qəbul olmuş abituriyentlərin siyahısı avqustun 13-də "Abituriyent" jurnalının 7-ci sayında dərc olunacaqdır. Jurnalı abituriyent.az saytından da ödəniş etməklə sifariş etmək mümkündür.
Ramiz Mehdiyevin kitabı türk dilində
12.08.2015
Azərbaycan Respublikası Prezidenti Administrasiyasının rəhbəri, akademik Ramiz Mehdiyevin Ermənistan-Azərbaycan, Dağlıq Qarabağ münaqişəsinin tarixi köklərinə həsr edilən “Dağlıq Qarabağ: məxəzlərdən oxunmuş tarix” kitabı Ankarada türk dilində çapdan çıxıb.
Türkiyənin Berikan yayım evi tərəfindən çap edilən kitabda münaqişənin yaranma səbəblərini əks etdirən, habelə Dağlıq Qarabağın bu ərazidəki Azərbaycan dövlətlərinə mənsub olmasını dəqiq göstərən müxtəlif tarixi mənbələr əksini tapıb.
Nəşrdə Cənubi Qafqazda ilk dövlət qurumlarının yarandığı vaxtdan başlanan tarixi dövr əhatə edilir və regionun müasir dövrə qədər tarixindən bəhs olunur. Əsərin müəllifi ilk fəsillərdə erməni (hay) etnosunun Kiçik Asiya ərazisinə və sonralar Cənubi Qafqaza gəlmə olmasını elmi cəhətdən əsaslandırır.
UNESCO Rasim Əliyevin ölümü barədə
13.08.2015
UNESCO-nun baş direktoru İrina Bokova Bakıda avqustun 9-da dünyasını dəyişmiş azərbaycanlı jurnalist Rasim Əliyevin qətlini pisləyib.
“Mən Rasim Əliyevə olunmuş hücumu pisləyirəm”, - baş direktor bəyan edib.
“Hökumət Əliyevin qətlində günahı olanların cəza almalarına nail olmalıdır. Bu, asayişin müdafiəsi və mətbuatın azadlığı üçün vacibdir. Jurnalistlərə qarşı cinayətin cəzasız qalmasına yol vermək olmaz”, - İrina Bokova əlavə edib.
Ali məktəblərdə 6 mindən çox yer boş qaldı
13.08.2015
Birinci mərhələ üzrə qəbul planı 83, 12 faiz dolub və 32 196 nəfər tələbə adı qazanıb. Həmin şəxslərdən 27 541 nəfəri orta ümumtəhsil müəssisələrini 2015-ci ildə bitirən məzundur.
Ölkə.Az APA-ya istinadən xəbər verir ki, bunu Tələbə Qəbulu üzrə Dövlət Komissiyasının (TQDK) mətbuat xidmətinin rəhbəri Elnur Nağızadə deyib.
E.Nağızadənin sözlərinə görə, dövlət və özəl ali təhsil müəssisələrinə ümumilikdə 6 555 yer boş qalıb:
700 bal toplayan abituriyentlər hansı ali məktəblərə daxil oldular? — SİYAHI
13.08.2015
Tələbə Qəbulu üzrə Dövlət Komissiyası 700 bal toplayan abituriyentlərin hansı ali təhsil müəssisəsinə daxil olmalarını açıqlayıb.
Ölkə.Az “Report”-a istinadla həmin siyahını təqdim edir:
İxtisas qrupu I
- Məmmədli İsa Elişad oğlu: - Bakı Ali Neft Məktəbinin Neft-qaz mühəndisliyi (Dövlət sifarişi əsasında)
- Abbasov Nihad Natiq oğlu: - Bakı Ali Neft Məktəbinin Neft-qaz mühəndisliyi (Dövlət sifarişi əsasında)
- Allahverdiyev Əli Allahverdi oğlu: - “Qafqaz” Universitetinin Mexanika mühəndisliyi (Dövlət sifarişi əsasında)
- İsmixanov Teymur Vüqar oğlu: “ADA” Universitetinin Kompüter elmləri (Ödənişli əsaslarla)
- Abduyev Firuz Bayram oğlu: - “Qafqaz” Universitetinin Kompüter mühəndisliyi (Dövlət sifarişi əsasında)
- Həsənli Arzu Ədalət qızı: - Bakı Ali Neft Məktəbinin Proseslərin avtomatlaşdırılması mühəndisliyi (Dövlət sifarişi əsasında)
- Əliyeva Nərmin Çingiz qızı: - “ADA” Universitetinin Kompüter mühəndisliyi (Ödənişli əsaslarla)
İxtisas qrupu II
- Qasımov Elçin Ziyad “Qafqaz” Universitetinin Mühasibat uçotu və audit (Dövlət sifarişi əsasında)
- Əhmədov İbrahim Əhməd “ADA” Universitetinin Beynəlxalq münasibətlər (Ödənişli əsaslarla)
- İsgəndərov Əli Rauf oğlu: - “ADA” Universitetinin Beynəlxalq münasibətlər (Ödənişli əsaslarla)
İxtisas qrupu III
- Novruzova Lalə Zəfər qızı: Azərbaycan Respublikası Prezidenti yanında Dövlət İdarəçilik Akademiyasının Hüquqşünaslıq (Dövlət sifarişi əsasında)
- Əfəndiyeva Xəyalə Rəvan qızı: - Azərbaycan Respublikası Prezidenti yanında Dövlət İdarəçilik Akademiyasının Hüquqşünaslıq (Dövlət sifarişi əsasında)
- Abdulrəhimov Kamran Hüseyn oğlu: - Bakı Dövlət Universitetinin Hüquqşünaslıq (Dövlət sifarişi əsasında)
İxtisas qrupu IV
- Mahmudova Asya İdris qızı: Azərbaycan Tibb Universitetinin Müalicə işi (Dövlət sifarişi əsasında)
- Məcidov Nurlan Namiq oğlu: Azərbaycan Tibb Universiteti Müalicə işi (Dövlət sifarişi əsasında)
Vergilər Nazirliyində qanunsuzluqlar aşkar edildi
13.08.2015
Neqativ hallar aşkar edildi
Vergilər Nazirliyinin Daxili təhlükəsizlik baş idarəsində 2015-ci ilin 2-ci rübündə daxili nəzarət qaydasında keçirilmiş tədbirlərin, bu zaman aşkar edilmiş intizam pozuntularının monitorinqi aparılıb.
Ölkə.Az Nazirliyin məlumatına istinadla xəbər verir ki, monitorinq nəticəsində müəyyən edilib ki, 2015-ci ilin 2-ci rübündə nazirliyin struktur bölmələrinin daxili nəzarət qrupları tərəfindən ümumilikdə 523, o cümlədən yerli vergi orqanlarında 442, nazirliyin aparatının struktur vahidlərində 81 daxili nəzarət tədbiri keçirilib.
Leyla və Arif Yunusa hökm oxundu
13.08.2015
Bakı Ağır Cinayətlər Məhkəməsində Sülh və Demokratiya İnstitutunun (SDİ) həbsdə olan direktoru Leyla Yunus və həyat yoldaşı Arif Yunusun cinayət işi üzrə məhkəmə prosesi günün ikinci yarısında davam etdirilib.
Ölkə.Az xəbər verir ki, APA-nın məlumatına görə, hakim Əfqan Hacıyevin sədrlik etdiyi prosesdə hökm elan olunub.
Məhkəmənin hökmü ilə Leyla Yunus 8 il 6 ay, Arif Yunus isə 7 il müddətinə azadlıqdan məhrum edilib.
Ermənilər işğal olunmuş ərazilərdə yenidən yanğın törədiblər
13.08.2015
Ağdamın işğal olunmuş Baş Qərvənd kəndinin ərazisində bu gün də ermənilər tərəfindən yanğın törədilməsi müşahidə olunub.
Ölkə.Az xəbər verir ki, APA-nın Qarabağ bürosunun xəbərinə görə, Baş Qərvənd ərazi vahidliyinin Bayramlar kəndində bu gün güclü yanğın törədilib. Yandırılan ərazilərdə hətta irigövdəli ağacların da alova büründüyü aydın görünür.
Havanın küləkli olması isə yanğının miqyasının getdikcə artmasına səbəb olur.
Xatırladaq ki, avqustun 11-dən etibarən ermənilər Ağdamın işğal altındakı Baş Qərvənd kəndinin ərazilərində yenidən yanğınlar törətməyə başlayıblar.
Rusiyanın döyüş gəmiləri Bakıda
13.08.2015
Avqustun 13-də Rusiya Federasiyası Xəzər Dəniz Donanmasının “Mahaçqala” və “Volqodonsk” kiçik artilleriya gəmilərinin, həmçinin “Anatoliy Qujvin” kiçik hidroqrafiya gəmisinin Bakıya rəsmi səfəri başlayıb.
Bu barədə Ölkə.Az-a Azərbaycan Müdafiə Nazirliyindən bildiriblər.
Məlumata görə, Rusiya hərbi gəmilərini Azərbaycan Respublikası Hərbi Dəniz Qüvvələrinin və Rusiya Federasiyasının ölkəmizdəki səfirliyinin nümayəndələri qarşılayıblar.
Əvvəlcə qonaqlar Hərbi Dəniz Qüvvələrinin həyətində ucaldılmış ulu öndər Heydər Əliyevin abidəsinin önünə gül dəstələri qoyublar.
Səfər çərçivəsində gəmilərin komandanlığı və şəxsi heyəti Fəxri xiyabanda ümumilli lider Heydər Əliyevin məzarını və Şəhidlər xiyabanını ziyarət edəcək.
Monqol sərhədçilər Azərbaycanın təcrübəsini öyrənirlər
13.08.2015
Dövlət Sərhəd Xidmətinin (DSX) rəisi, Sərhəd Qoşunlarının Komandanı general-polkovnik Elçin Quliyevin dəvəti ilə Monqolustan Ədliyyə Nazirliyinin Sərhəd Mühafizə Baş İdarəsinin (SMBİ) rəisi general-mayor Şarxuu Lxaçinjavın başçılıq etdiyi nümayəndə heyəti 12-14 avqust tarixlərində Azərbaycana rəsmi səfər edib.
Ölkə.Az DSX-nın məlumatına istinadla xəbər verir ki, səfərin məqsədi Azərbaycanın sərhəd təhlükəsizlik sistemi, Dövlət Sərhəd Xidmətinin sərhəd mühafizəsi üzrə fəaliyyəti və qabaqcıl təcrübəsi ilə tanışlıqdan ibarət olub.
Elçin Quliyev Monqolustan nümayəndə heyətini qəbul edib.
Səhiyyə Nazirliyindən özəl tibb müəssisələrinə — CİDDİ XƏBƏRDARLIQ
14.08.2015
Səhiyyə Nazirliyi özəl tibb müəssisələrinə ciddi xəbərdarlıq edib.
Bu barədə Ölkə.Az-a nazirliyin mətbuat xidmətindən bildirilib.
Məlumata əsasən, özəl tibb müəssisələri tərəfindən xarici tibb mütəxəssisləri dəvət edilərkən Nazirlər Kabinetinin 12.01.1999-cu il tarixli 5 nömrəli qərarı ilə təsdiq edilmiş "Xarici ölkələrdə hazırlıq alan tibb və əczaçılıq işçilərinin Azərbaycanda tibb və əczaçılıq fəaliyyəti ilə məşğul olmağa buraxılması Qaydası"na uyğun olaraq həmin ali və ya orta tibb işçiləri üçün Səhiyyə Nazirliyindən şəhadətnamə alınmalıdır.
Azərbaycanda torpaqların məlumat bankı yaradılır
14.08.2015
Azərbaycanda bütün kateqoriyalı torpaqların elektron uçotu, xəritələşməsi və məlumat bankının yaradılması istiqamətində işlər aparılır.
Bunu “Əmlak Məsələləri Dövlət Komitəsinin torpaq münasibətlərinin tənzimlənməsi və torpaq bazarının təşkilində aidiyyəti dövlət qurumları və bələdiyyələrlə fəaliyyətinin kordinasiyası” mövzusunda keçirilən işgüzar forumda Əmlak Məsələləri Dövlət Komitəsinin sədr müavini Rafiq Cəlilov deyib.
Onun sözlərinə görə, torpaqların elektron informasiya sisteminin yaradılması ilə bağlı hazırda beynəlxalq təcrübə öyrənilir. O, qeyd etdi ki, artıq sözügedən prosesə beynəlxalq ekspertlər cəlb olunub.
Ən yaşlı azərbaycanlı dünyasını dəyişdi
14.08.2015
Azərbaycanın ən uzunömürlü vətəndaşı dünyasını dəyişib.
Ölkə.Az xəbər verir ki, APA-nın yerli bürosunun məlumatına görə, Zərdab rayonunun Məlikli kənd sakini 1888-ci il təvəllüdlü Süfü Mikayıl qızı Bayramova yaşadığı kənddə 127 yaşında vəfat edib.
Qeyd edək ki, üç əsrin şahidi olan Süfü Bayramova Azərbaycanın ən yaşlı seçicisi kimi qeydiyyata alınıb.
Vasif Talıbov yeni idarə yaratdı
14.08.2015
Naxçıvan Muxtar Respublikası Ali Məclisinin sədri Vasif Talıbov Naxçıvan Muxtar Respublikasının Fəxri Xiyaban İdarəsinin yaradılması haqqında sərəncam verib.
Ölkə.Az xəbər verir ki, APA-nın məlumatına görə, sərəncama əsasən “Naxçıvan Muxtar Respublikasının Fəxri Xiyaban İdarəsi haqqında Əsasnamə” də təsdiq edilib.
Əsasnaməyə əsasən Naxçıvan Muxtar Respublikasının Fəxri Xiyaban İdarəsi Fəxri Xiyabanın idarə edilməsi sahəsində dövlət nəzarətini həyata keçirən orqandır. Fəxri Xiyaban İdarəsinin fəaliyyət istiqamətlərinə Fəxri Xiyabana dair planlaşdırma işlərini təşkil etmək, Fəxri Xiyabanla bağlı zəruri tədbirləri və qanunvericiliyin tələblərinə əməl olunmasına dövlət nəzarətini həyata keçirmək, öz səlahiyyətləri çərçivəsində dəfn mərasimlərini təşkil etmək, Fəxri Xiyabanda təmir və bərpa işlərini həyata keçirmək və qanunvericiliklə müəyyən edilmiş digər istiqamətlərdə fəaliyyət göstərmək daxildir.
10 milyona az qaldıq
14.08.2015
İlin əvvəlindən Azərbaycan Respublikasında əhalinin sayı 52,3 min nəfər və ya 0,5 faiz artaraq 2015-ci ilin iyul ayının 1-i vəziyyətinə 9 milyon 644 min 300 nəfərə çatıb.
Dövlət Statistika Komitəsindən (DSK) Ölkə.Az-a bildiriblər ki, iyulun 1-dək ölkədə əhalinin bir kvadrat kilometrinə olan sıxlığı 111 nəfər olub. Əhalinin ümumi sayının 53,1 faizi şəhərlərdə, 46,9 faizi kəndlərdə yaşayır.
Azərbaycanda cinsi say üstünlüyü yenə qadınların tərəfindədir. Hazırda ölkədə əhalinin 49,8 faizi kişilər, 50,2 faizi qadınlardır və ya hər 1000 nəfər kişiyə 1009 nəfər qadın düşür.
Yaş kateqoriyalarına gəldikdə isə respublikada əhalinin 22,4 faizi 0-14 yaşda, 71,6 faizi 15-64 yaşda, 6 faizi isə 65 və yuxarı yaş həddindədir.
2015-ci ilin ilk altı ayı ərzində ölkədə 78,4 min körpə doğulub və əhalinin hər 1000 nəfərinə hesabı ilə bu göstərici 16,6 təşkil edib.
Doğulan körpələrin 53,2 faizini oğlan, 46,8 faizini isə qız uşaqları təşkil edir. Körpələrin 1370-i əkiz, 48-i isə üçəm doğulanlardır.
Ötən ilin müvafiq dövrünə nisbətən ölkədə ölüm halları (200 nəfər) azalıb. Eyni zamanda, bu dövrdə respublikada bağlanan nikahların da sayında azalma (200 fakt) müşahidə edilib. Bunun əksinə olaraq, boşanmaların sayı isə (500 fakt) artıb.
Azərbaycan vətəndaşı Moskva aeroportunda 1,7 milyon dollarla saxlanıldı
14.08.2015
Moskvada “Şeremetyevo” aeroportunda 1,7 milyon dollar nəğd vəsait keçirmək istəyən Azərbaycan vətəndaşı saxlanılıb.
APA-nın “Moskva xəbərləri” agentliyinə istinadən verdiyi xəbərə görə, adı açıqlanmayan həmyerlimiz müvafiq gömrük bəyannaməsində 1 milyon dolları qeyd edib.
Baxış keçirilərkən isə çantada əlavə 700 min dollar aşkarlanıb. Müvafiq orqanlar həmyerlimizin fəaliyyətində cinayət əlamətlərinin olub-olmamasını araşdırır.
Qeyd edək ki, saxlanılan şəxs Dubay-Moskva aviareysinin sərnişini olub.
Keçmiş "Azərbaycan" kinoteatrı sökülür
14.08.2015
Şəhərin mərkəzində yerləşən və bir vaxtlar “Azərbaycan” kinoteatrının yerləşdiyi bina sökülür.
Binanın ətrafı hasara alınıb və söküntü işləri aparılır.
Qeyd edək ki, Səbail Rayon İcra Hakimiyyətinin şöbə müdiri İsrafil Kərimov açıqlamasında həmin binanın özəlləşdirildiyini və təmirə bağlandığını bildirmişdi.
Ölkə.az
