Prezident olmaq üçün 1 milyard dollar xərcləyəcək

ABŞ-da Respublikaçılar partiyasından prezidentliyə namizəd milyarder Donald Tramp seçki kampaniyasına 1 milyard dollar xərcləməyə hazırdır.

Jurnalistlərdən biri ona seçkiqabağı kampaniyaya bu qədər pul xərcləyə bilcəyini soruşanda Tramp müsbət cavab verib.

"Bəli, əgər lazım olarsa, mən o pulu xərcləməyə hazıram. Mən ildə 400 milyon dollar qazanıram, nə fərqi var ki? Mən tək bir şey istəyirəm - öz ölkəmi daha əzəmətli edəm", - deyən Respublikaçı namizəd əlavə edib ki, onun digər namizədlərdən üstünlüyü öz kampaniyasını özünün maliyyələşdirməsidir.

Bundan başqa Tramp dövlət başçısı seçilərsə, ABŞ-da qeyri-qanuni yaşayan bütün miqrantları ölkədən çıxaracağını deyib. "Biz çalışacağıq ki, ailələr bir yerdə olsun. Amma onlar ölkəni tərk etməlidirlər", - deyən milyarder namizəd ABŞ prezidenti Barak Obamanın miqrantlar haqqında qərarını da ləğv etmək niyyətindədir. Həmin qərara əsasən, ABŞ-a gələn miqrantların sənədləri olmasa belə, onların uşaqlarının ölkədən çıxarılması qadağandır.

Keçirilən sorğuya əsasən, Donald Tramp respublikaçı namizədlər arasında liderdir. İndiyədək seçki kampaniyalarında səbəbkar olduğu qalmaqalların onun reytinqinə müsbət, yoxsa mənfi təsir etdiyi isə hələ də bilinmir. Belə ki, Donlad Tramp kampaniyalar zamanı cəmiyyət içində rəqiblərindən birini təhqir edib, teledebat işçiləri ilə mübahisə edib və Respublikaçılar partiyasının bir neçə üzvü ilə dalaşıb. (ans)

Ölkə.Az