Mənsur Şərifov: "Instagram"da tanış olduğum qızla evlənmərəm, amma...

Onu sosial şəbəkələrin fenomeni adlandırmaq daha doğru olardı. Çünki 4-5 il əvvəl efirdə olanda bu qədər populyar deyildi. Hər halda bu, mənim şəxsi qənaətimdir. Amma indi Mənsur Şərifov deyəndə ilk ağıla gələn vine (vayn-red) olur. Beləliklə, Ölkə.Az-ın suallarını Mənsur Şərifov və həmkarı Altun Mətləboğlu cavablandırır.

- Mənsur, istərdim əvvəlcə səni tanıyaq...

- 1990-cı il fevralın 25-də Bakı şəhərində anadan olmuşam. 2008-ci ildə Əmircandakı 87 saylı məktəbi bitirmişəm. Mədəniyyət və İncəsənət Universitetinin estrada aktyorluğu fakültəsinin məzunuyam. Bir illik hərbi xidmətdən sonra da bax belə...

- Bir müddət öncə daha çox efirdə idin...

- Efirdə olduğum müddətdə tələbə idim. 2009-cu ildə "Planet Parni iz Baku"nun "Şən nar" yumor kuboku layihəsinə qatılmışam. O vaxt öz fakültəmizi təmsil edirdik. Layihəni altıncı yerdə başa vurduq. 2010-2011-ci illərdə eyni layihədə "Əmircan prodakşn" komandası olaraq iştirak etdik və üçüncü olduq. Bir dəfə fakültəmizi, bir dəfə kəndimizi təmsil etmişəm. Ardınca əməkdar artist Tahir İmanov məni öz teatrına dəvət etdi. "Ağ-qara" və "Onlayn yubiley" konsertlərində iştirakım oldu. Sonra iş-güc imkan vermədi ki, davam edim.

- İndi hansı işdə çalışırsan?

- Özəl prodakşnda nəzarətçi işləyirəm.

- Vine çəkməyə nə vaxt başladın?

- Mən həmkarım Altunla eyni universitetdə oxumuşuq...

Bu yerdə Altun Mətləboğlu da söhbətimizə qoşulur.

- Mənsur məndən bir kurs yuxarıda oxuyurdu. Amma mən axıra kimi oxuya bilmədim. Təsadüfən bir prodakşnda işlədik. Space-də bunların verilişinin rejissoru idim.

- Mənsur, bəs ilk vine necə yarandı?

- Bir il öncə hamı kimi mən də Facebook-da idim. Səhifələrin birində Tural adlı oğlan vine çəkib paylaşmışdı. Yaşda məndən qat-qat kiçik olsa da, çox istedadlı uşaqdır, Almaniyada yaşayır. Baxdım və düşündüm ki, niyə də məndə olmasın? Yəqin digər tərəf müqabilim Qalibi tanıyırsınız. Eyni məhəllədə böyümüşük. Ona dedim ki, bəlkə belə bir şey edək. İlk vine-də mövzu dostluq idi. Oturub söhbət edirdik ki, guya aramızda su da keçə bilməz və növbəti kadrda bir-birimizi qırırıq. Təbii ki, ilk olduğuna görə elə də güclü alınmamışdı.

- Bəs vizit kart olan vine hansı oldu?

- Əsgərlik haqda olan vine ilə "partlatdıq".

- İndiyədək neçə vine çəkmisən?

- Təxminən 300-ə yaxın vine çəkmişik.

- İdeyaları kim verir?

- Yaxın dostlarla oturanda bir-birimizlə zarafatlaşırıq. Belə-belə ortaya bir ideya çıxır. Bütün vine-lərimiz demək olar ki, belə yaranıb.

- İdeyalar daha çox sənə aid olur, yoxsa Altunla Qalibə?

- Daha çox Qaliblə mənə. Altunda aktyorluq daha çoxdur.

- Ən uğurlusu hansı olub?

- Tanınmağımda əsgərlik haqda vine böyük rol oynayıb.

- Məkanları xüsusi seçirsiniz?

- Məkanın fərqi olmur və telefonla çəkirik.

- Maraqlı nələr olur çəkilişlərdə?

- Məsələn, çəkilişin ən maraqlı yerində zəng gəlib.

Altun: -Otuz dubla çəkdiyimiz vine də olub.

Mənsur: -Taksi vine təxminən 30 dubla çəkilmişdi.

- Bəs bir dubla çəkilənlər?

Altun: Demək olar ki, əksəriyyətini bir dubla çəkmişik.

- Düşünürsənmi ki, vine aktyor üçün daha dar çevrədir...

- Xeyr, o barədə düşünməmişəm. Vine çəkəndə qarşıma məqsəd qoydum ki, seviləcəm. Yəni məqsədim tanınmaq olmayıb. Şükürlər olsun ki, sevilməyi bacardım.

- Üç nəfərsiniz və vine-lərdə də ön planda özün olursan. Bu, digər iki nəfərin haqqını yemək deyilmi?

Altun: -Maşallah, Mənsurda boy buxun... (gülür)

- Deməzdim ki, ön planda oluram...

Altun: -Mən deyərdim.

- Bəlkə vine çəkməyə tək başlamışam, ondan ola bilər. Bunlar gəlib vine-lara duz qatdılar.

- Yəni əvvəl duzsuz idi?

- Duzsuz deməzdim, bir balaca şor elədilər də.

- Sonuncu vine nə vaxt çəkilib?

- Dünən çəkmişəm və bu günə qədər 4 mindən artıq baxış var.

- Gənc viner Hüseyn Əzizoğlu da bu aralar çox populyardı. Onu özünə rəqib görürsənmi?

- Bu elə sahədir ki, rəqib deməzdim. Onun da, mənim də öz sevənlərim var. Hüseynlə bir dəfə görüşmüşəm.

- Hüseynlə fərqiniz nədədir?

- O qlobal mövzulara daha çox toxunur, məndə isə sırf söz oyunumdur.

- "Bu şirindi" adlı vine də maraqlı alınmışdı. İdeya kimin idi?

- İzləyicilərimdən biri bu ideyanı mənə vermişdi.

- Uğurlu olacağını gözləmədiyin, amma uğurlu alınan vine olub?

- Olub. Məsələn, dünən çəkdiyim vine istədiyim qədər baxılmadı.

- Toylara gedirsən?

- Toylara getmirik. Amma hansısa məkanın açılışına çağırırlar. Yəni reklamlardan gəlirimiz olur. Bu yaxınlardan bir taksi xidmətinin reklamına çəkildik.

- Toylara getməməyinizin səbəbi?

Altun:- Baxır hansı toya gedirsən də.

- Sosial şəbəkələrdə çox fəalsan...

- Hazırda "Instagram"da 60200 nəfər izləyicim var. Amma hamısı aktiv deyil. Adam var baxır, nə bəyənir, nə fikrini bildirir. Facebook-da dostluq limitim dolub, 10 min də izləyicim var.

- Efirsiz, pulsuz tanınmaq çətin deyil?

- Çətindir, amma maraqlıdır.

- Yəqin ki, qızlar sənə daha çox yazır. Olurmu tanınmağından istifadə edəsən?

- Düzdür, çox yazırlar. Amma sübut da edə bilərəm ki, tanınmağımdan istifadə etməmişəm.

- Ehtiyat etmisən...

- Bəli, ehtiyat etmişəm. İnsan tanındıqca hər hərəkətinə ikiqat artıq məsuliyyət daşıyır. Bu, çox çətin məsələdir.

- Səni aktyor hesab etməyimiz daha doğrudur, yoxsa viner?

- Mən aktyorluğu bitirmişəm və sənətim aktyordu.

- Film, serial təklifləri olurmu?

- Olsa çəkilərəm.

Altun: - Hazırda film üzərində işləyirik. Sponsor məsələsi də demək olar ki, həll olunub. Tammetrajlı komediya filmi olmalıdır.

- Hansı məbləğ lazımdır filmin ərsəyə gəlməsi üçün?

- Əlli min pul olsa, çəkə bilərik.

- Bir vine üçün hansısa rayona getmisən?

- Ucarda çəkdiyim vine olub. Amma sırf vine üçün rayona getdiyim olmayıb.

- Yolda, küçədə daha çox tanınırsan, yoxsa sosial şəbəkələrdə daha maraqlısan?

- Hər ikisi. Amma sosial şəbəkələrdə olan reaksiyalar daha maraqlıdır. Çünki real həyatda məndə kompleks yaranıb.

- Yəni bu qədər tanınırsan?

- Bunu danmaq olmaz ki, az da olsa tanıyan var.

- İnsanların səni tanıdığını hiss edəndə utanırsan, yoxsa xoşuna gəlir?

- Qəribə hissdir, sözlə izah edə bilmərəm. Bir də görürsən tanımadığın kimsə sənə baxıb gülür.

- Çəkdiyin vine dərhal sosial şəbəkələrə buraxılır, yoxsa ehtiyatda saxladıqların da olur?

- Bəzən ehtiyatda saxlayıram. İndi vine yoxumdur. Amma dünən üç vine çəkib paylaşmışam.

- Tək çəkmək maraqlıdır, yoxsa Qalib və Altunla?

- Tək çəkmək bir az çətindir.

- Çox qısa çəkirsən...

- Vine proqramı 6.5 saniyədir. Mənim indi çəkdiklərim artıq vine deyil. Viner idim, indi videobloggerəm. Yəni sosial şəbəkə fenomeni.

- Fikrincə Azərbaycanda ən sevilən viner kimdir?

- Elvin İbra. O, çox kreativ mövzulara toxunur.

Altun: -Elvini çox adam başa düşmür, amma kreativdir.

Mənsur: - Son zamanlar Nicat (Niko) da əla vine-lər çəkir.

- Özünü bu siyahıda neçənci görürsən?

- Onu mən deyə bilmərəm.

Altun: - Mənsur hazırda ölkədə bu sahədə birincidir. Amma dostum olduğuna görə demirəm.

- Bu yaxınlarda milli komandamızın və "Qarabağ"ın futbolçusu Qara Qarayevlə çəkdiyin vine maraqlı alınmışdı. Amma çox adam elə bildi ki, həmin vine Qaranın icazəsi olmadan çəkilib.

- Oturub çay içirdik, qəfil ideya gəldi. O vine 3 dubla çəkilib. Qara özü deyir ki, bu məsələ mənim ən yaralı yerimdir, bununla da nöqtə qoyaq bitsin (gülür).

- Başqa kimlə vine çəkmək istərdin?

- Heç kimlə. Qara Qarayevlə də təsadüfən alındı. O, dostumuzdur.

- Kimsə gətirir ki, bu uşağı da vine-yə çək...

- İstedadlı olsa niyə çəkmirəm ki?

- Nə vaxta qədər vine çəkməyi düşünürsən?

- Artıq 25 yaşım var. Yəqin vaxtım olmayanda çəkməyəcəm. Hələ ki vine çəkməyə vaxtım var.

- Subaysan...

- Bəli.

- Mümkündürmü hansısa pərəstişkarınla ailə qurasan?

- İnanmıram. Sırf sosial şəbəkəni nəzərdə tutursunuz?

- O da ola bilər.

- "Instagram"dan tanıdığım qızla dost olaram, amma evlənmərəm.

- Başqa kimlərlə dostsan?

- Məsələn, İlkin Həsəni çox sadə insandır. Onun sənətinə, insanlığına böyük hörmətim var. Şəxsən tanıyandan sonra da hörmətim ikiqat artdı. Məni çağırdı, Cavidan Novruzun vasitəsi ilə görüşüb söhbət elədik. Dedi ki, çəkdiklərinə baxıram və çox bəyənirəm. Elə məşhurlar da var ki, sənə baxırlar, amma büruzə vermirlər.

- Olub ki vine-yə görə səni hədələsinlər?

- Elə şey olmayıb. Vine elə şeydir ki, başladınsa, dayana bilmirsən. Bu ömür mənə bir dəfə verilib və onu istədiyim kimi yaşamaq istəyirəm. Kimə xoş deyil, baxmasın.

- Kitab oxuyursan?

- Yalan deyərəm. Amma bacardıqca saytları oxuyuram. İşdən sonra da dostlarla görüşürük, vine çəkirik. Vine olmayanda da evimizə gedirik. Vine xəstəlik kimidir. Söhbət edəndə də beynim ideya axtarır. Bəzən elə ideyalarım olub ki, düşünüb gülmüşəm, amma səhər yadımdan çıxıb, çəkə bilməmişəm. Halbuki bəlkə də 5 vine-dən biri olardı. Vine xəstəlikdir, hər yerdə ideya axtarırsan.

- Birbaşa çəkilir, yoxsa montaj edirsiz?

Altun: -Bəzən olur, amma səksən faizi montajsızdır.

Mənsur: -Vine meyxana kimidir, təbi gəlməlidir. Ötən dəfə dostumuz Turalla bir layihə olmalıydı. Dedi gündə neçə vine çəkərsən. Dedim bir saat vaxt ver. Altunla qıraqda bir saata 30 vine ideyası gəldi.

- Yenidən film barədə danışaq. Filmə kimlər çəkiləcək?

Altun:-Film barədə əvvəlcədən nəsə demək istəmirəm. Aktyorlar, rejissorlar təyin olunub.

- Peşəkarlardı?

- Peşəkarlar da var, sosial şəbəkələrdən tanınan uşaqlar da.

- Komediya filmləri çox çəkilir. Narahat deyilsiniz ki, bu bolluqda uğur qazana bilməzsiniz?

Mənsur: - Biz onsuz da sevilirik niyə narahat olaq?

Altun: - İnşallah, bu film alınsa çəkilənlərin 99 faizini üstələyəcək.

Mənsur: - Bu yaşıma qədər çox işlər görsəm də, heç birində özümə güvənməmişəm. Amma burada özümə güvənirəm.

Altun: - Ssenari elə yazılıb ki, tutmaya bilməz. Uşaqlar da çox istedadlıdırlar. Amma hadisələr barədə heç nə deyə bilmərəm.

- Mənsur, ailənin çəkdiyi vine-lərə münasibəti necədir?

- Məni ancaq dəstələkləyirlər. Bu arada deyim ki, ilk dəfə səhnəyə 1999-cu ildə çıxmışam. Məktəblilər arasında qran-pri qazanmışam. "Əyriqulaq və dəcəl dovşan" tamaşasında oynadığım siçan roluna görə mənə Gənc Tamaşaçılar Teatrından iş təklifi gəlmişdi.

- Başqa maraqlı olacaq bacarığın var?

- Heç adi rəqs etməyi bilmirəm. Bundan başqa ciddi bacarığım yoxdur.

- Bəs bacarmadığın?

Altun: -Maşınıpark etməyi bacarmır (gülür).

- Və son olaraq izləyicilərinə sözün...

- İzləyicilərimlə bacardığım qədər səmimiyəm. Və bundan sonra da səmimi olacağam.