ADP-nin blok sevdası "suya düşdü"

ADP sədri Sərdar Cəlaloğlu seçkiyə Ümid partiyası və adını açıqlamadığı başqa bir partiya ilə blok şəklində qatılacağını bildirmişdi.

Ölkə.az-a verdiyi açıqlamasında ADP sədri bildirdi ki, adının açıqlanmasını istəmədiyi partiya əvvəl blok şəklində seçkiyə getməklərinə razı olsa da sonradan fikrini dəyişib.

Sərdar Cəlaloğlunun sözlərinə görə, həmin partiya yeni qərar qəbul edib və onlara blok yaratmaq istəmədiklərini bildirib. Buna görə də, o məsələ artıq gündəmdən çıxıb.

ADP sədri, nəticəsi olmadığına görə, partiyanın adını açıqlamayacağını deyib.

ADP-nin Ümid partiyası ilə "Qarabağ" bloku kimi birgə seçkiyə gedəcəyi də sual altındadır.

Sərdar Calaloğlu: "O məsələni hal-hazırda müzakirə edirik. Ümid partiyasının 125-lərlə bağlı qərarı var. O siyahı mətbuatda da açıqlanıb. Dəqiqləşdirmə aparırıq. Ümid partiyasının da seçkilərə blok şəklində gedəcəyinin qeyri-müəyyənliyi var. Sabah bu məsələ qəti surətdə həll olunacaq".

Sərdar Calaloğlu blok şəklində olmasa da partiya şəklində seçkilərə qatılacağını bildirib.

"Bütün ehtimallarla seçkidə iştirak etmək niyyətimiz var, ancaq hansı formada, o qeyri-müəyyəndir. Blok şəklində getsək gərək 50% namizəd partiyamızdan olsun. Blok şəklində getməsək təxminən partiyamızdan 20-30 nəfər parlament seçkilərində namizədliyini vermək istəyir", deyə Sərdar Calaloğlu sözlərinə əlavə edib.

Qeyd edək ki, Sərdar Calaloğlu paytaxtın Nəsimi rayonundakı seçki dairəsindən namizədliyini irəli sürməyi planlaşdırır.

Səxavət Məmməd
Ölkə.az