Qabil Hüseynli: "Onlar müxalifətçilikdən müəyyən dividentlər əldə etmyə çalışırlar"

Parlament seçkilərinə az bir müddət qalsa da ölkədəki siyasi fəallıq demək olar ki, hiss olunmur.

Seçkiləri AXCP və Milli Şura baykot edir, YAP bütün dairələrə iddialı olduğunu deyir, Müsavat seçkilərə qatılacağını artıq elan edib. ADP blokdaş axtarır, Ümid 125-lərlə birgə hərəkət edir, gənclər isə "Ağ Blok"la uğur qazanmaq fikrindədirlər.

Ölkənin siyasi vəziyyətini və seçkiqabağı şəraitini politoloq Qabil Hüseynli Ölkə.az-a verdiyi açıqlamasında şərh edib.

Qabil Hüseynli: "Belə görünür ki, ölkə müxalifəti pərən-pərən düşüb. Müxalifətin bir qismi boykot taktikası ilə əslində siyasi rəqabətdən, siyasi mübarizədən yayınır".

Seçkiyə hazır olanlar və boykot xətti seçənlər

YAP-ın seçkilərə hazır olduğunu hiss edirik. Digər partiyalar haqqında bunu demək çətindir. Seçkini baykot edənlər haqqında isə politoloq dedi ki, AXCP və Lalə Şövkət seçkilərin boykot edilməsi xəttini seçiblər. Yəqin ki, buna axıra qədər riayət edəcəklər. Müxalifətin içərisindən demək olar ki, son dövrlər xeyli zəifləmiş, gücdən düşmüş, müxalif qüvvə kimi ictimai proseslərə təsir etmə riçaqlarını itirmiş Müsavat partiyası da seçkilərə qatılacağı barədə bəyanat verib, amma bu seçkilərdə müxtəlif siyasi manevrlər edib nəyəsə nail olmaq xəttini tutduğu hiss olunur. Bu da güman etmirəm ki, onların işinə xeyir verəcək.

Ümid partiyası və ADP-nin blok sevdası

Politoloq Ümid və ADP haqqında isə bu fikirləri səsləndirib: "ADP ilə Ümid partiyası blok şəklində seçkiyə getmək istəyirlər. Ancaq blokun alınmayacağı artıq bu günlərdə bəlli oldu. Ümid 125-lər klubu ilə seçkiyə qatılmaq istəyir. ADP artıq təkbaşına qatılmaq istəyir. Sərdar Cəlalaoğlu deyir ki, seçkilərdə 20-30 nəfərlə iştirak edəcəyik. Partiya sədri hələ dəqiq bilmir neçə nəfərlə seçkiyə gedəcək. Seçkiyə belə yanaşdıqları üçün nəticə də bildiyimiz kimi olur. 125-lər klubu 125-in yarısı qədərdi. 125-ləri tanıyan adamların sayı da çox azdır. Az-çox mətbuat oxuyan, ölkədə baş verən siyasi prosesləri izləyən adamlar belə bir qrupun mövcudluğu haqqında məlumatlı deyillər. 125-lər nə siyasi partiyadır, nə bölgələrdə təşkilatları, qrumları var. 125-lərin tərkibində müəyyən hadisələrdə parlamış adamlar var".

Fraksiyalar

"Müxalifətin içərisində müxtəlif fraksiyalar var. Fraksiyalardan biri Qubad İbadoğlunun başçılıq etdiyi ADR hərəkatıdır. Onlar hələlik seçkilər barəsində qəti bir fikir söyləməyiblər. Hər halda onlar da seçkilərdə iştirak edəcəklər. Başqa bir fraksiya isə sonradan formalaşmış gənclərin "Ağ Blok"udur. "Ağ Blok"un sıraları geniş olmasa da, orada kifayət qədər təcrübəli və temperamentli gənclər birləşiblər. Onların siyasi prespektevinə inanmaq mümkündür", deyə Qabil Hüseynli davam edib.

Bütlər

Dəyişilməyən partiya liderləri haqqında Qabil Hüseynlinin söylədikləri isə bundan ibarət oldu: "Siyasətə mütləq yeni simalar gəlməlidir. Yeni sima yeni söz deməkdir, yeni siyasi xətt, yeni əhval-ruhiyyə, yeni ümid deməkdir. Ən pis cəhət budur ki, onlar müxalifətçiliyə bir sənət, peşə, iş yeri kimi yanaşırlar. Müxalifətçilikdən müəyyən dividentlər əldə etməyə çalışırlar. Bu artıq onların həyat tərzinə çevrilib".

"Ölkə müxalifətinin pərən-pərən düşmüş siyasi palitrası belədir. Əvvəllər siyasi bloklar şəklində seçkilərə qatılan, beləliklə də əhalinin etimadını qazanan müxalifət, bir-biri ilə rəqabət aparan, bir araya gəlməyi bacarmayan qruplara çevrilib. Bu da onların cəmiyyətdəki nüfuzunun aşağı düşməsi ilə bağlıdır. Bu hal gələcəkdə onlara yaxşı heç nə vəd etmir", deyə politoloq sözlərini bitirib.

Səxavət Məmməd
Ölkə.az