Gülənçi prokurorlar Türkiyədən gizli sənədlər aparıblar

Gülənçi prokurorların Türkiyədən qaçdıqları, əvvəlcə Gürcüstana, daha sonra isə Almaniyaya getdikləri haqda məlumat vermişdik.

Ölkə.az Türkiyə mətbuatına istinadən xəbər verir ki, gülənçi prokurorlar Zəkəriyyə Öz və Calal Qara Türkiyədən gizli sənədlər çıxarıblar.

Mühüm işlər üzrə prokurorlar olan hər iki şəxsin Almaniyaya gizli sənədlər apardıqları və hazırda Türkiyə əleyhinə olan bu kompromatların Almaniya kəşfiyyatında olduğu bildirilir.

Türk mediasına MİT-dən sızan məlumata görə, Almaniya həmin sənədlərin qarşılığında prokurorlara ölkələrində istədikləri qədər qalmaq icazəsi və həyatlarına zəmanət verib.

Xatırladırıq ki, "paralel yapı" məsələsində Almaniya öz ərazisindəki gülənçilərə aid fondların, mərkəzlərin və şirkətlərin yoxlanmasından imtina edərək Ərdoğanın istəklərinin heç birini yerinə yetirmədi. Bu məsələ Berlinlə Ankaranın arasının soyumasına səbəb oldu.

Hazırda Türkiyədə "paralel yapı"nın arxasında Almaniya kəşfiyyatının durduğu haqda fikirlər formalaşıb. Hətta bəzi ekspertlər daha da irəli gedərək Gülənin ABŞ-da yaşamasının bir "Almaniyadan diqqət yayındırma fəndi" olduğunu da deyirlər.

Ölkə.az