Politoloq: "Bu heç vaxt Rusiyanın çökməsinə gətirib çıxara bilməz"

"Stratfor" təşkilatı Kremlin sanksiyaları ağırlaşdırmaq siyasətinin özü üçün ağır nəticələr verəcəyini bildirib

ABŞ-ın ən nüfuzlu araşdırmalar mərkəzi olan "Stratfor" Rusiyada baş verən siyasi, iqtisadi və sosial prosesləri analiz edərək geniş hesabat hazırlayıb.

Hesabatda bildirilir ki, iqtisadi və maliyyə böhranı dövründə Krmlin belə bir qərar verməsi xalqın neqativ reaksiyası ilə qarşılanıb. Aparılan analizlər və müşahidələr nəticəsində məlum olub ki, hətta məmurların əksəriyyəti belə yuxarıların bu qərarı ilə razı deyillər. Rublun davamlı devalvasiyasının fonunda xaricdən gətirilən ərzaq məhsullarına sanksiyaların tətbiq edilməsi isə daxili bahalaşmaya və nəticədə rublun inflyasiyasının güclənməsinə gətirib çıxardı. Getdikcə dərinləşən böhran rus rublunun daha da ucuzlaşmasına, bu isə istehlak mallarının qiymətlərinin qalxmasına və nəticədə büdcədən aldığı kiçik həcmli maaş və ya təqaüdlə dolanan təbəqənin sosial vəziyyətini daha da ağırlaşdıracaq.

"Stratfor" təşkilatının yaydığı hesabata politoloq Zərdüşt Əlizadə Ölkə.az-da münasibət bildirib.

Zərdüşt Əlizadə: ""Stratfor" beyin mərkəzidir. Orada xeyli sayda keçmiş kəşfiyyatçılar işləyir. O təşkilat yalnız beyin mərkəzidir və orada ekspertlər təhlillər, analizlər yazılar, hazırlayır. Onlardan başqa dünyada yüzlərlə adam var ki, Rusiyanı gözləyən gələcəkdən danışıb, münəccimlik edirlər. Bəzi alimlər var ki, bütövlükdə dünyanı gözləyən gələcək fəlakətlərdən yazırlar. Təhlilçilər başqa-başqa ölkələrin dağılacağından, o cümlədən Rusiya, hətta Azərbaycanın dağılacağından yazırlar. Bu mövzular onlar üçün çörəkdir, onlar bu yolla qazanıırlar. Qaldı Kremlin sanksiyaları ağırlaşdırmaq siyasətinə, bu heç vaxt Rusiyanın çökməsinə gətirib çıxara bilməz".

Səxavət Məmməd
Ölkə.az