Məmmədyarov beynəlxalq festivalda liderlik edir

Avstriyada “Vyana Open 2015” beynəlxalq şahmat festivalı davam edir. 

50 ölkədən 850 şahmatçının iştirak etdiyi yarışda Azərbaycanı qrossmeysterlər Eltac Səfərli və Nərgiz Umudova təmsil edirlər. Festival A ,B, C və D turnirlərindən ibarət keçirilir.

Festival çərçivəsində Şəhriyar Məmmədyarov və yerli şahmatçı Markus Ragger arasında 6 oyundan ibarət görüş təşkil olunub. Birinci partiyada ağ fiqurlarla oynayan Şəhriyar Məmmədyarov 26-cı gedişdə rəqibini məğlub edib. İkinci partiya isə heç-heçə nəticələnib. Beləliklə, 2 turdan sonra Ş.Məmmədyarov 1,5-0,5 hesabı ilə öndədir. Qrossmeysterlər arasında matç avqustun 22-dək davam edəcək.

A turnirində mübarizə aparan Eltac Səfərli 4-cü turda İngiltərə təmsilçisi Kosima Keen üzərində qələbə qazanıb. Nərgiz Umudova isə Almaniya şahmatçısı Manfred Herboldla sülh bağlayıb. Dörd turdan sonra Nərgiz Umudova aktivinə 2,5, Eltac Səfərli isə 2 xal yazdırıb.

Turnir isveçrə sistemi üzrə 9 turdan ibarət olaraq keçirilir. (azertac)

Ölkə.Az