Sərdar Calaloğlu: "Razi Nurullayevin o fikri ilə razıyam ki, Əli Kərimli..."

Razi Nurullayev bildirib ki, ya Əli Kərimli partiyadan gedəcək və ya da biz Ədliyyə Nazirliyinə müraciət edib hüquqi təmsilçilik uğrunda mübarizə aparacağıq.

AXCP-nin Etimad Qurultayının Təşkilat Komitəsi mətbuat konfransı keçirib. Konfransda Razi Nurullayev AXCP-nin möhürünü Əli Kərimlidən alacağını bildirib.

Xalq Cəbhəsindəki növbəti qalmaqalı ADP sədri Sərdar Calaloğlu Ölkə.az-a verdiyi açıqlamasında şərh edib.

Sərdar Calaloğlu: "Razi Nurullayevin bu mövqeyi düzgün deyil. O, istefa verib AXCP-dən çıxıb. AXCP-dən çıxdığına görə də cəbhə haqqında fikir söyləmək haqqı yoxdur. Razi Nurullayev cəbhənin tərkibində qalıb, cəbhənin nizamnaməsinə uyğun qurultay keçirə bilərdi. AXCP rəhbərliyinin dəyişməsinin nizamnamə üzrə proseduru var. Qurultay çağırılmalıdır, Qurultayda sədr məsələsinə baxılmalıdır. Keçmiş cəbhəçiləri başına yığıb belə bir şey iddia etmək düzgün deyil, qanuna ziddir.

AXCP-nin parçalanmasına gəldikdə təbii ki, burada Əli Kərimlinin yeritdiyi siyasətin çox böyük rolu var. Əbülfəz bəy dünyasını dəyişməmiş cəbhədə parçalanma var idi, o, dünyasını dəyişdikdən sonra isə bu parçalanma sürətləndi. Əvvəlcə Əli Kərimli və Mirmahmud bəyin rəhbərliyi altında AXCP iki yerə parçalandı. Sonradan Əli Kərimlinin öz yanındakı insanlar onun idarə metodlarından narazı olduqlarına, siyasi mövqeyi ilə barışmadıqlarına görə, onun yanından uzaqlaşıb müxtəlif təşkilatlar yaratdılar. Razi Nurullayevin o fikri ilə razıyam ki, Əli Kərimlinin öz təşkilatında avtoritar mövqe tutması Azərbaycan müxalifətinin içərisində separatizmə meyilli olması, zaman-zaman hakimiyyətlə müəyyən oyunlar içərisinə girməsi həqiqətən də Cəbhəni çox ciddi şəkildə yaraladı".

Qeyd edək ki, AXCP yaranandan bu günə kimi dəfələrlə parçalanıb. Bir zamanların kommunist partiyasına müxalif yaranmış tək və vahid müxalif hərəkatı olan Xalq Cəbhəsi günümüzdə onlarla xırda təşkilata və hətta qrupa parçalanıb. Partiyadan ayrılan narazıların bir hissəsi partiyalar, hərəkatlar yaradaraq hazırda da siyasi fəaliyyətlərini davam etdirirlər.

Səxavət Məmməd
Ölkə.az