Vaqif Sadıqov: "Artıq Avropa klubları bizim klubları ciddiyə almalıdır"

Futbol klublarımızın Avropadakı uğurlu çıxışı davam edir

UEFA Avropa Liqasının pley-off mərhələsindəki ilk görüşündə Ağdamın "Qarabağ" klubu səfərdə İsveçrənin "Yanq Boyz" klubuna 0-1 hesabı ilə qalib gəldi.

Azərbaycanın "Qəbələ" klubu isə Yunanıstanın "Panatinaikos" klubu ilə evdə heç-heçə oynadı.

Klublarımızın çıxışını AFFA-nın Məşqçilər Komitəsinin sədri Vaqif Sadıqov Ölkə.az-a verdiyi açıqlamasında şərh edib.

Vaqif Sadıqov: "Klublarımızın uğur qazanacağını əvvəlcədən demişdim. "Qarabağ" oyundan-oyuna güclənəcək və biz bunu görürük. İkinci hissədə "Qarabağ" nəyə qadir olduğunu "Yanq Boyz"a göstərdi. Artıq Avropa klubları bizim klubları ciddiyə almalıdır. Fiziki cəhətdən "Yanq Boyz" bizdən güclü olsa da hər şeyi oyun həll etdi. "Qarabağ" səfərdə qalib gəlsə də, evdə işi asan olmayacaq. Futbolçular rahatlaşmamalıdır. Səfərdəki ciddiyyət və xarakterlə meydana çıxıb burada da qalib gəlməlidirlər.

"Qəbələ" güclü "Panatinaikos"la bərabər səviyyəli futbol oynadı. "Qəbələ"nin statistikalarına baxanda görürük ki, klubun ikinci oyunları daha həlledici olur. Ona görə də, "Panatinaikos" səfərindən nəticə gözləyə bilərik.

Hər iki klubumuzun növbəti mərhələyə keçəcəyinə inanıram. Hər iki klubumuz oyunları ilə qrup mərhələsini haqq edirlər. Klublarımızın uğurlu çıxışı Milli komandamıza da təsir edəcək. Klublarla Milli komanda zəncirvari işləməlidir. Bir sevindirici hal da ondan ibarətdir ki, Milli komandamızın oyunçularının əsas oyunçuları "Qarabağ" və "Qəbələ"də oynayır".

Qeyd edək ki, "Qarabağ" - "Yanq Boyz", "Qəbələ" - "Panatinaikos" klubları arasındakı cavab oyunları bir həftədən sonra - avqustun 27-də keçiriləcək.

Səxavət Məmməd
Ölkə.az