Səfirlikdən yandırılan qaçqın sığınacağı ilə bağlı
Xəbər verdiyimiz kimi, bu gün Almaniyanın Bavariya əyalətinin Noyştad-Valdnab şəhərində azərbaycanlıların da yaşadığı qaçqın düşərgəsində yanğın olub.
Məsələ ilə bağlı Azərbaycanın Almaniyadakı səfirliyi açıqlama yayıb.
Daxil olan açıqlamanı olduğu kimi təqdim edirik:
“Səfirliyimizin Oberpfalts Baş Polis idarəsindən əldə etdiyi məlumata görə, yanğının baş verdiyi binada cəmi 19 nəfər olmaqla, 10 nəfər Azərbaycan, 2 İran, 2 Ukrayna, 2 Kosovo, 2 Ermənistan, 1 Konqo vətəndaşı məskunlaşmışlar. Bunlardan 3-nün isə azyaşlı uşaq olduğu qeyd olunub. Oberpfalts Baş Polis idarəsinin Baş polis komissarı cənab Mixael Rebelenin verdiyi məlumata görə, yanğın bu gün təqribən saat 03.20 radələrində baş verib, binada yaşayan iranlı şəxs öncə, qonaq üçün nəzərdə tutulmuş otaqda yanğın tüstüsü hiss edib, daha sonra oradan iki nəfər şəxsin qaçdığını görüb. Daha bir nəfər qaçan şəxsləri binanın qarşısında gözləyib.
Oberpfalts Baş Polis idarəsi yanğın nəticəsində bina sakinlərindən heç birinin xəsarət almadığını, yalnız binanın 1-ci mərtəbəsinə dəyəri yüzlərlə avro məbləğində maddi ziyan dəydiyini dilə gətirib. Sözügedən idarədən verilən məlumata görə, yanğının baş verməsindən dərhal sonra, hələ gecə ikən hadisənin səbəblərini araşdırmaq məqsədilə xüsusi istintaq qrupu yaradılıb və işin istintaqı hazırda davam edir.
Bavariya əyalətinin daxili işlər naziri Yoaxim Herman hadisənin ksenofobiya zəmnində törədildiyini istisna etməyərək, məsələnin araşdırılması üçün əlindən gələni edəcəklərini bildirib.
Səfirliyimiz məsələni diqqətdə saxlayır və yanğın hadisəsinin obyektiv surətdə araşdırılması üçün AFR hüquq-mühafizə orqanları ilə əməkdaşlığını davam etdirir”.
Ölkə.Az
