Ermənistanda ictimai gərginlik artır

Tamamilə iflasa uğrayan Ermənistanda ictimai gərginlik azalmır

Hökumətə qarşı yaradılan “Ayağa qalx, Ermənistan” vətəndaş hərəkatına dəstək verənlərin sayı isə artmaqdadır.

“Ayağa qalx, Ermənistan” vətəndaş hərəkatının fəalları 2 aydan çoxdur ki, ölkə rəhbərliyinin yarıtmaz siyasətinin əleyhinə nümayişlər keçirirlər. Sosial problemlər fonunda təşkil edilən aksiyalarda siyasi tələblər irəli sürülür, hakimiyyət istefaya çağırılır.

Məhz belə bir vaxtda Ermənistan ağsaqqallar şurasının təşəbbüs qrupu yaşlı nəsli vətəndaş mübarizəsinə qoşulmağa çağırıb. Bununla bağlı ağsaqqallar şurasının yaydığı bəyanatda qeyd edilib ki, yaşlı nəslin nümayəndələri müxtəlif siyasi və vətəndaş hərəkatlarının iştirakçısı və şahidi olublar. Onlar gənclərin mübarizəsini alqışlayır və ölkədəki bu yeni siyasi mədəniyyətin inkişaf etdirilməsi üçün bütün Ermənistanı ayağa qalxmağa səsləyirlər.

Ermənilər ölkədəki yoxsul həyat tərzindən, problemlərdən beziblər. Erməni siyasi müşahidəçisi Naira Ayrumyan baş verənlərlə bağlı hökuməti kəskin tənqid edib. Əhalinin gəlirlərində heç bir dəyişiklik yoxdur. Ermənistan Dövlət Statistika Xidmətinin məlumatına görə, yanvar ayından etibarən ərzaq məhsullarının qiyməti əhəmiyyətli dərəcədə yüksəlib. Təkcə son bir ayda qiymətlər 7 faizə yaxın qalxıb. Məmurlar isə bu vəziyyətdə belə varlanmaq üçün ölkəni çapıb-talamaqdadırlar. (AZƏRTAC)

Ölkə.Az