Toğrul Allahverdili: "Bu həyasızlıqları çox bağlı qapıları onların üzünə açır"
Azərbaycan-Slavyan Gənclər Assosiasiyasının Moskva nümayəndəsi, tanınmış gənc fəal Toğrul Allahverdili Ölkə.az-ın qonağı olub.
Fürsətdən istifadə edib Toğrul bəyə Rusiyadakı diasporumuz, onun fəaliyyəti haqqında çoxlu suallar verdik və çox maraqlı cavablar aldıq.
Ölkə.az həmin müsahibəni oxucularının diqqətinə çatdırır:
- Toğrul bəy, Rusiyadakı Azərbaycan diasporunun hazırkı durumu necədir?
- İlk öncə ölkə.az kollektivinə məni redaksiyanıza dəvət etdiyinizə görə təşəkkür edirəm. Rusiyadakı Azərbaycan diasporunun bu günkü durumuna keçən illərə baxanda əla demək olar çünki, əvvəllər diasporamızda parçalanma və özbaşınalıq hökm sürürdüsə, son zamanlar bu hallar artıq azalıb. Bildiyiniz kimi ən böyük Azərbaycan diaspora təşkilatı Rusiyada fəaliyyət göstərir. Diasporamız artıq Rusiyanın bütün regionlarında təşkilatlanıb. Misal olaraq Heydər Əliyev fondunun vitse-prezidenti Leyla xanım Əliyevanın rəhbərlik etdiyi Rusiyanın Azərbaycanlı gənclər təşkilatının, Ulu öndər Heydər Əliyevin və Rusiya prezidenti Cənab Vladimir Putinin xeyir-duası ilə təsis olunan Ümumrusiya Azərbaycanlıları Konqresini misal çəkmək olar .
- Müxtəlif diaspora təşkilatlarımız arasında fikir ayrılıqları və ziddiyətlər haqda söz-söhbətlər gəzir. Bu haqda nə deyə bilərsiniz?
-Azərbaycan diaspora təşkilatlarının sayına görə ilk yeri Rusiya tutur və bu çoxluqda ara-sıra bir-biri ilə xırda münaqişə edən şəxslər də olur. Elə diaspor rəhbərləri var ki, diasporanı öz əmlakları sayırlar və təşkilata biznes fəaliyyəti kimi yanaşırlar, bu da vətənimizin yolunda təmənnasız xidmət edən şəxslər tərəfindən haqlı olaraq etirazla qarşılanır . Başqa bir tərəfdən də diaspor təşkilatlarımız arasında anti-milli qüvvələrə xidmət edənlər də var. Hətta elə diaspor təşkilatlarımız var ki, dini cərəyanların təsiri altında fəaliyyət göstərirlər. Rusiyada nurçuluq rəsmən qadağan olunduğu üçün Gülən camaatının Rusiyadakı üzvləri Azərbaycan diasporu adı ilə fəaliyyət göstərirlər. Azərbaycan mədəniyyət mərkəzləri, məktəbləri açaraq özlərini təmizə çıxartmaq istəyirlər. Azərbaycan hökümətinin də mübarizə apardığı bir dini cərəyanın Rusiyada diasporamızın adı altında fəaliyyəti bizlər tərəfindən narazılıqla qarşılanır. İkinci ən böyük problemli diaspora təşkilatımız isə "Azərros" təşkilatıdır ki, bu haqda da mətbuatda yetərincə məlumat var.
- Rusiyadakı səfirliyimizin diaspora ilə işi sizi qane edirmi? Xahiş edirik səmimi cavab verəsiniz...
- Dövlət başçımız İlham Əliyevin Dünya Azərbaycanlılarının III Qurultayında çıxışında bildirdi ki , "Səfirliklərlə diaspor təşkilatları arasındakı əməkdaşlıq daha da güclü, daha da məqsədyönlü olmalıdır. Mən bu alqışları eşidirəm və görürəm ki, nə demək istədiyimi siz də yaxşı başa düşürsünüz. Mən çox dərinə getmək istəməzdim, amma bəzi hallarda səfirliklərlə diaspor təşkilatları arasında olan ziddiyyətlər məni çox incidir. Biz buna yol verməməliyik. Səfirlik Azərbaycan dövlətinin bir parçasıdır, Azərbaycan dövlətinin rəsmi nümayəndəliyidir, Azərbaycan dövlətinin xarici ölkələrdə simvoludur. Biz elə etməliyik ki, səfirliklərlə diaspor təşkilatları arasında daim mehriban münasibətlər olsun".
Cənab prezidentin bu tapşırığı bizim hər birimiz tərəfindən yerinə yetirilir, ancaq elə hallar olur ki, səfirliyimizin bəzi diplomatları səfirliklə bizi üz-üzə qoymağa çalışır, öz şəxsi maraqları naminə cənab səfirə yanlış məlumatlar verirlər və fəaliyyətimizə kölgə salmağa çalışırlar. Ancaq ümumi götürdükdə səfirliyin fəaliyyətindən razıyıq . Cənab səfir Polad müəllimin və səfirin birinci müavini Qudsi Osmanovun diasporamızın inkişafı və birliyi naminə gördüyü işlər hər bir diaspor üzvü tərəfindən alqışlanır.
- Milli mediamızın diasporanın fəaliyyətindəki rolu hansı səviyyədədir?
- Bildirmək istərdim ki , Azərbaycan telekanallarının və informasiya agentliklərinin Moskvada nümayəndəlikləri var və biz onlarla da əməkdaşlıq edirik. İstərdik ki, telekanallarımız diasporamıza daha da çox diqqət ayırsınlar necə ki, internet-media bu işin öhdəsindən layiqincə gəlir.
- Bildiyimiz kimi siz həm də diasporinfo.com saytının rəhbərisiniz. Sizcə diaspora təşkilatları ilə işləmək çətin deyil ki?
- Çətin olduğu qədər maraqlı və məsuliyyətli bir işdir. Diasporunfo.com saytını təsis etməkdə məqsədimiz diasporamızı bir yerə toplamaq, onlara dünyada fəaliyyət göstərən diasporamızın gördüyü işlər və gündəlik baş verən hadisələr, keçirilən tədbirlər haqqında dəqiq və yeni xəbərləri çatdırmaqdır. Ancaq elə olur ki, bizdən inciyənlər də olur. Bəzi diaspora üzvləri var ki, saytımızın vasitəsi ilə öz piarlarını aparmaq, özlərini reklam etmək istəyirlər. Biz isə belə hallara qarşıyıq və məhz belə şeylər onlarla aramızda narazılığa səbəb olur.
- Bu yaxınlarda hədələndiyiniz barədə sosial şəbəkələrdə xəbərlər yayıldı. Bu haqda nə deyə bilərsiniz?
- Bu sualınıza cavab vermək istəmirəm. Olan oldu, keçən keçdi, belə deyək, ancaq onlara bildirmək istəyirəm ki, Toğrul Allahverdilinin kimdənsə qorxusu yoxdur və mən göydə Allaha yerdə dövlət başçımıza güvənirəm.
- Bizim diaspora təşkilatları ilə düşmənlərimizin, ermənilərin Rusiyadakı diasporası arasında müqayisə aparmaq olar?
- Hal-hazırda Azərbaycan diasporu erməni diasporasından qat-qat güclüdür və bunu sizə tam əminliklə deyirəm.
- Axı onların diasporasının daha güclü olduğu göz önündədir... Onların güclü olmasının səbəbi sizcə nədir?
- Onların diasporası da zəif deyil. Onları bizdən fərqləndirən bir cəhət var ki, onlarda yaltaqlıq satqınlıq var, bizə isə bu xüsusiyətlər yaddır və onların bu həyasızlıqları çox bağlı qapıları onların üzünə açır.
- Bizim diasporanın güclənməsi üçün nə etmək lazımdır, hansı işlər görülməlidir?
- İlk öncə diaspora fəaliyyətindən lobbiçilik fəaliyyətinə keçməliyik. Şəxsi maraqları bir kənara qoyub milli maraqlar ətrafında birləşməliyik. Cənab prezident tərəfindən Rusiyadakı səfirliyimizə birinci müavin təyin edilən Qüdsi Osmanovun bir sözü var. Deyir ki, "Ulu öndər daim gəncliklə fəxr edib. Çalışmaq lazımdır ki, diasporamızı da gəncləşdirək".
Söhbətləşdi: Qafqaz Ömərov
Ölkə.az
