Mağazalar niyə endirim edir?

Fəsil dəyişməsinə bir ay qalmış endirim faizlərilə bəzənən geyim mağazalarının vitrinləri heç şübhəsiz ki, daha çox alıcı cəlb etməyə hesablanır

Lakin bəzən vitrinlərdə yazılan endirim faizləri heç də bütün geyimlərdə tədbiq edilmir. Amma ən əsası istənilən hadisə baş verir, yəni endirim elan edən mağazaya daha çox alıcı üz tutur. Şəhərdə apardığımız sorğuda iştirak edənlərin əksəriyyəti də məhz endirim zamanı geyim mağazalarının daha cəlbedici olduğunu bildirdilər.

Bir vaxtlar 100 və ya 120 AZN-ə satılan hər hansı bir geyimin endirim zamanı 30 və ya daha aşağı qiymətə alıcıya təklif edilməsi bir çoxlarında həmin geyimin maya dəyərilə bağlı şübhələr yaradır. Yəni müştəri mağaza sahiblərinin onları aldatdığını və əslində həmin geyimlərin endirim qiymətindən belə aşağı qiymətə alındığını, lakin daha baha qiymətə satıldığını düşünür. Mağaza sahibləri isə bunu başqa cür izah edirlər.

Sahibkar Sərvər Hüseynovun sözlərinə görə, endirim olanda bu o demək deyil ki, malın maya dəyəri daha aşağıdır və ya mağaza itkiyə gedir: “ O, geyim qaldıqca daha böyük itkiyə gedə bilər. Əlimizdə nəğd pul etmək üçün keyfiyyəti ölməmək üçün, ola bilər ki, o malın seriyası qırılır, yəni həmin maldan bir 46 ölcüsü qalır, onu baha qiymətə sata bilmərik”.

Yəni bir ölçüdə qalan geyimdən yaxa qurtarmaq üçün sahibkar onu maya dəyərindən də daha ucuz qiymətə alıcıya sata bilər. Çünki həmin geyimin digər ölçülərindən götürülən məbləğ çəkilən bütün xərcləri ödəyir və buna görə də sahibkar bir malda itkiyə getməsini riskə ala bilir.

Müsahibə verməkdən yayınan bəzi mağaza sahibləri isə endirim qiymətinin əslində normal satış qiyməti olduğunu bildirirlər. Lakin çəkilən xərcləri və icarə haqqını ödəmək üçün bəzən hər hansısa geyimi əsas qiymətindən dəfələrlə baha qiymətə satışa qoymağa məcbur olurlar. Belə çıxır ki, bahalı satılan geyimlərin qiymətinə təsir göstərən faktor onların keyfiyyəti deyil, harda satışa çıxarılmasıdır. Ona görə də ekspertlər alıcıları daha etibarlı geyim mağazalarından alış-veriş etməyə çağırır.

İqtisadçı ekspert Qubad İbadoğlu deyir ki, həqiqətən də bu günləri özünə hörmət edən bir şirkət hansı ki, o bir brenddir, bunun artıq bir adı var şəbəkəsi var, beynəlxalq miqyasda o, şirkətlərin mallarına üstünlük verməlidirlər: “Yoxsa ayrıca bir müxtəlif şirkətlərdən daxil malların belə endirimləri həqiqi və real endirimlər deyil. Və bunlar istehlakçının hüquqlarının pozulmasıdır”.

Belə olan halda isə həm endirimlərdən düzgün yararlana, həm də daha keyfiyyətli geyim əldə edə bilərsiniz. (ANS TV)

Ölkə.Az