Sabah 700 bal toplayan 15 abituriyentlə görüş keçiriləcək

Bu il qəbul imtahanlarında 700 bal toplayan abituriyentlərlə sabah Bakıda görüş keçiriləcək

Avqustun 25-i saat 12:00-da Bakı Gənclər Evində keçiriləcək görüşdə Təhsil Nazirliyi, Tələbə Qəbulu üzrə Dövlət Komissiyası, Gənclər və İdman Nazirliyindən nümayəndələr, bir sıra millət vəkilləri, tanınmış ictimaiyyət nümayəndələri iştirak edəcək.

Eyni zamanda tədbirə müxtəlif şirkətlərin əməkdaşları qatılacaq və abituriyentlərə hədiyyələr veriləcək
Ölkə.Az Modern.az-a istinadən xəbər verir ki, bu barədə Parlament Jurnalistlər Birliyinin (PJB) sədri Elşad Eyvazlı məlumat verib. O, deyib ki, PJB-nin təşkilatçılığı ilə hər il 700 bal toplayan abituriyentlərlə görüş keçirilir.

“PJB tərəfindən silsilə olaraq bu cür tədbirlərin keçirilməsində məqsəd təhsil qəhrəmanlarının ölkə miqyasında tanıdılması, eyni zamanda həmin 15 tələbənin gələcəkdə qəbul imtahanlarında iştirak edəcək digər abituriyentlərə örnək olmasını aşılamaqdır.

Həmçinin burada məqsəd ölkə üzrə qəbul imtahanlarında rekord nəticə göstərən gənclərə dəstək olmaqla, onların gələcək illərdə də daha böyük uğurlara imza atmasına ruhlandırmaqdır”.

Qeyd edək ki, bu il qəbul imtahanalarında 15 nəfər 700 bal toplayıb.

Onlardan 7-i I qrup, 3-ü II qrup, 3-ü III qrup, 2-i isə IV qrup üzrə rekord nəticə göstərib. Görüşdə iştirak etmək istəyənlər(051) 340-81-83, (055) 946-06-60 nömrəli telefonlarla əlaqə saxlaya bilərlər.

Bütün KİV-lər dəvətlidir.

 

Ölkə.Az