"Azdrama" boyda "ana"nı ortalığa qoymaq
İntiqam VALEHOĞLU
Biri var idi, biri yox idi. Azərbaycan adlı bir məmləkətdə Akademik Milli Dram Teatrı adlı bir mədəniyyət ocağı vardı. Bu teatr son 5-6 ilə kimi ölkənin ana teatrı sayılırdı. Sonra bu "ana"nı ayıb da olmasın, qoydular ortalığa, gələn girdi, gedən çıxdı, qırğınlar oldu, davalar düşdü, aktrisalar saçyolduya çıxdılar, aktyorlar "hiyyaa" eləyib karate fəndləri göstərdilər. Mədəniyyət və Turizm Nazirliyi də məsələyə münasibət bildirmədi. Elə bu münasibətsizlikdən ürəklənən idmançı aktyorlar teatrın yaxınlığındakı idman zalına yazıldılar, məşq elədilər, güclərinə güc qatdılar, bədən şişirtdilər, bilək yoğunlatdılar. Biləklər yoğunlamaqda olsun, görək bundan əvvəl nələr oldu...
Sonra yay tətili oldu, Gümrah Ömər adlı rejissor bir müsahibə verdi. Bu müsahibə teatrın aktyorları arasında çaxnaşma saldı. Direktor əvvəlcə rejissoru müdafiə eləmək istədi. Sonra gördü ki, bu xına o xınadan deyil. Nəysə, söhbət çox uzandı, hətta direktor barədə teatrın daxilində yaranmış lətifələr mətbuata çıxdı. Amma yenə nazirlikdən bir səs çıxmadı. Axırda həmin rejissorun adından bir yekkkə üzrxahlıq dolu mətn saytlara ötürüldü. Burası belə qalsın, keçək bilək məsələsinə.
Hə, bilək məsələsinin harasında qalmışdıq? Nəysə, aktyorlar məşq elədilər, elədilər, elədilər...Axırda avqustun 23-ü yetişdi. Teatr guya Allah qoymasa, növbəti mövsümünü açacaqdı. Aktyorlar teatra getdilər. Gördülər ki, direktor teatrda yoxdur, istirahətdədir. Yəni məzuniyyətdə... Nəysə, canım sizə desin ayın 23-də baş verənlərdən. Aktyorlar gördülər ki, direktor yoxdur. Yığışdılar teatrın həyətindəki "besedka"ya, başladılar söhbətləşməyə. Xeyli deyib güləndən sonra xalq artisti Ramiz Məlik dedi ki, uşaqlar, çıxım tabelə qol çəkim, qayıdıram. Elə Ramiz Məlik tabelə qol çəkməyə getmək istəyəndə yolda onun qabağını digər xalq artisti Ramiz Novruz kəsdi. Dedi ki, ayə, o nədir facebook-da mənim haqqımda yazırsan? Sən bilirsən indi mən burda nə oyun çıxarda bilərəm? Xülasə, yazının bu yerində qarşılıqlı düüüüd gedir. Axırda Ramiz Novruz nətəəər "rezki" çönüb Ramiz Məlikə bir yumruq vurursa, kişini Kazım Abdullayev birtəhər aradan çıxardır. Ramiz Novruz ikinci dəfə Ramiz Məlikin üstünə cumanda digər aktyorlar araya girirlər. Hər iki aktyorun bəxti onda gətirir ki, yumruq R.Məlikin sinəsindən tutmur. Çünki Ramiz Məlik təzəlikcə açıq ürək əməliyyatı keçirib.
Hə, bu boyda zırıltıdan sonra jurnalistlərin bir əlində telefon, bir əlində diktofon direktor İsrafil israfilovu axtarırlar. Amma İsrafilov necə deyərlər, yağlı əppək olub yoxa çıxıb. Teatrın mətbuat katibi deyir ki, direktor məzuniyyətdədir, aktyorlar da deyirlər ki, cənab İsrafilov srağagün, yəni davadan bir gün öncə mədəniyyət ocağında olub.
Uzun sözün qısası, iş indi Yasamal rayonu 27-ci polis bölməsindədir. Amma nazirlik deyir dillənmərəm ki, dillənmərəm. Mətbuatdan oxuduqlarıma görə, nazir Əbülfəs Qarayev Goranboydadır və vətəndaşları qəbul etməklə məşğuldur. Əldə etdiyim və hələ ki dəqiqləşdirə bilmədiyim digər məlumata görə, son hadisədən sonra bütün teatrların nəzdində idman kurslarının yaradılması qərara alınıb.
İndi hamı cənab nazirin Goranboydan gəlməsini gözləyir. Görək idman kursları söhbəti doğrudur, yoxsa rəhmətlik Nəsibə Zeynalova demişkən, yalanpışdan başımızı aldadırlar.
