İpoteka krediti ilə mənzil sahibi olmaq asanlaşacaq
Dövlət başçısı Nazirlər Kabinetinin fəaliyyətinə həsr edilən son müşavirədə ipoteka proqramına əlavə 200 milyon manatın ayrılması ilə bağlı göstəriş vermişdir və eyni zamanda hökumətə kredit şərtlərinin təkmilləşdirilməsini də tapşırmışdı.
Bu göstərişə əsasən dövlət büdcəsindən Azərbaycanın İpoteka Fonduna əlavə 200 milyon manat vəsaitin ayrılması gözlənilir.
Həmçinin ipoteka kreditlərinin məbləğinin artırılması, faizlərin aşağı salınması ilə bağlı yeniliklərin tətbiq olunacağı gözlənilir. Mərkəzi Bankın elan etdiyi ipoteka yenilikləri bu ilin payızında qüvvəyə minəcək.
Yeni qaydaların tətbiqi üçün ilk növbədə qanunvericiliyə dəyişiklik edilməlidir. Parlament isə bu məsələyə payız sessiyasında, sentyabrda baxacaq. İlkin məlumatlara görə, dəyişikliklər ipotekanın maksimum məbləğinin 2 dəfə artırılmasını (50 min manatdan 100 min manata qalıdırlmasını) eyni zamanda faizlərin adi ipotekada 6%-ə, sosial ipotekada isə 3%-ə endirilməsini nəzərdə tutulur. Eyni zamanda regionlarda da İpoteka kreditləşməsinin həyata keçirilməsi reallaşa bilər, bu da faizlərin aşağı salınması şərtlərin bir qədər də sadələşməsinə səbəb olacaqdır. Mərkəzi bankın bu addımı mənzil bazarındada böyük canlanma yarada bilər.
Statistik məlumatlara görə, bölgələrdə əhalinin orta aylıq əmək haqqı paytaxtla müqayisədə 2 dəfə azdır və bu da əhalinin ipoteka müraciəti üçün imkanlarının məhdud olmasına gətirib çıxarır: Nəzərə alaq ki, adi və sosial ipoteka üçün tələb edilən əmək haqqı məbləği adətən təxminən 650-700 manatdan çox olur. Bu isə az gəlirli region vətəndaşlarının bu imkandan yararlanmasını çətinləşdirirdi. Amma faizlərin aşağı salınması həmçinin rayonlarda yaşayan və ipoteka krediti götürmək istəyən vətəndaşlarımız üçün əmək tələblərini yumşaldacaq. Çünki faiz nə qədər az olarsa, tələb olunan əmək haqqı tələbi də aşağı düşür. Bu isə ona gətirəcək ki, 350-400 manat aylıq gəliri olan regionda yaşayan bir vətəndaş, bir gənc ailə, rahat ipoteka kreditlərindən yararlana biləcək. Bütövlükdə isə nəzərdə tutulan dəyişikliklər müsbət olmaqla yanaşı kreditlərə əlçatanlığı artıracaq.Ümümilikdə bu addım gənc ailələrin evsizlik probleminin həllinə öz töhvəsini verəcəkdir. Bir sözlə, ipoteka kreditləşməsi artıq yeni mərhələyə qədəm qoyduğun da söyləmək olar.
İldırım Qurbanov
Ölkə.Az
