Valyuta bazarında nə baş verir?

Neftin ucuzlaşan qiymətləri fonunda bütün dünyanın valyuta bazarında baş verənlər artıq yalnız hökumətləri və iş adamlarını deyil, sadə vətəndaşları belə düşündürən əsas problemə çevrilib.

Ölkə.az xəbər verir ki, dünənki iflas dalğası Nyu-Yorkdan tutmuş Asiya birjalarına hər yeri təlatümə gətirdi. Başda Rusiya olmaqla keçmiş SSRİ-nin bütün respublikalarının milli valyutası dollara nisbətdə kəskin şəkildə ucuzlaşmağa başladı.

Keçən həftənin şənbə və bazar günləri bütün valyutadəyişmə məntəqələrinin bağlı olduğu Azərbaycanda isə əhali nəfəsini çəkib səbirsizliklə bazar ertəsini gözlədi. Bazar ertəsi səhər tezdən isə bütün dollar almaq istəyənlər valyutadəyişmə məntəqələrinin qarşısında növbəyə dayandılar.

Mərkəzi bankın açıqlamalarına görə, kommersiya banklarına kifatəy qədər dollar verilmiş və Azərbaycan manatının məzənnəsi ABŞ valyutasına nisbətdə tam sabit qalmalı idi. Yəni dolların qiyməti 1,04 manatdan yuxarı olmamalı idi. Amma dünən Bakının valyutadəyişmə məntəqələrində tamam başqa rəqəmlərlə qarşılaşdıq.

Şəhərin mərkəzi hissəsində yaxınlaşdığımız 10-a yaxın valyutadəyişmə məntəqəsində isə tamam başqa səhnə ilə qarşılaşdıq. Dolların alış qiyməti 1,052, satış qiyməti isə 1,055 AZN idi. Yaxınlaşıb dollar soruşduğumuz bütün məntəqələrdə isə bizə dolların olmadığını bildirdilər.

Bundan başqa şəhərin mərkəzindəki valyutadəyişmə məntəqələrinin bir çoxu isə ümumiyyətlə bağlı idi.

Bu gün səhər Mərkəzi bankın yaydığı məlumatda isə hətta doların məzənnəsinin 0,04% azalaraq 1,0466 olduğu bildirildi. Nəticə çıxarmağı isə vətəndaşlarımızın öhdəsinə buraxırıq.

Ölkə.az