“Qiyməti ucuz görüb bu şirniyyatları alırlar, amma...” - Ekspertdən SOS

Qida məhsullarının keyfiyyətsiz olması ilə bağlı fikirlər nə dərəcədər doğrudur? Alıcılar nəyə diqqət yetirməlidir? 

Mövzu ilə bağlı Ölkə.Az-a danışan qida mütəxəssisi İlkin Şirinov yağların keyfiyyətsizliyi ilə bağlı bir sıra vacib məqamlara diqqət çəkib:

“Bu gün məhsulların tərkibində palma yağının həddindən artıq çox olması, istər-istəməz insanlarda ürək-damar xəstəliklərini intensivləşdirir. Bu, məsələnin birinci tərəfi. 

İkinci tərəfdən ata-babadan belə bir misal var ki, yağ əl temperaturunda əriyirsə, ondan istifadə etmək olar. Amma gəlin baxaq görək, bu gün marketlərimizdə satılan yağlar hər hansı biri dediyimiz o temperaturda əriyə bilirmi? Mən deyərdim ki, 90%-də bu, yoxdur. Çünki yağın tərkibində olan soya və palma tərkibli konsentrantların qatqılığı çoxdur.

Elə yağlar var ki, gün işığına çıxaranda qətiyyən ərimir. Hesab edirəm ki, bu yağ məsələsi insanlarımızın bir bəlasıdır”.

Ucuz qiymətə şirniyyatlar

İ.Şirinov bu gün bir çox marketlərdə satılan ucuz qiymətə və uşaqları cəzb edən şirniyyatlarla bağlı da narahatlığını ifadə edib:

“Bu gün İran istehsalı olan şirniyyatlar mağazalarda müştərilərə çox ucuz qiymətə təklif olunur. Amma o şirniyyatların üzərində tərkibi haqqında məlumat yazılmayıb, ya da Azərbaycan dilində tərcüməsi qeyd olunmayıb. Bu cür məhsulların satış qiyməti 10, 15, 20 qəpik təşkil edir. Ucuz qiymət valideynləri sövq edir ki, bu şirniyyatları alsınlar və uşaqlarına yedirsinlər, amma nəticə heç kimi maraqlandırmır. Həmin şirniyyatlar bu gün bütün marketlərimizdə kütləvi şəkildə satılır”.

Mütəxəssis əlavə edib ki, insanlar hər hansı qida məhsulu alarkən onun tərkibi ilə yanaşı, saxlama şəraitinə də nəzər yetirməlidir:

“Tərkib məsələnin birinci tərəfidir. Digər vacib nüans isə məhsulun saxlama şəraitidir. Ola bilər ki, hansısa məhsulun istifadə müddəti bitməyib. Amma onun üzərində qeyd olunan saxlama temperaturuna əməl edilməyibsə, heç kim onun tərkibində gedən dəyişikliklərdən sığortalanmayıb. Saxlanma temperaturuna ən çox əməl olunmayan məhsullar adətən süd-qatıq məhsullarıdır.

Ətin kilosundan bir neçə dəfə ucuz kolbasalar

İ.Şirinov bir sıra ət məhsulları ilə bağlı da alıcılara tövsiyələr verib:

“Bu gün Respublikamızda kolbasa, sosiska istehsalı kütləvi hal alıb və ucuz qiymətə müştəriyə təklif olunur. Hər zaman müştərilərə məhsul alarkən bir məsələni diqqətdə saxlamağı tövsiyə edirəm.

Ölkəmizdə mal ətinin bir kiloqramının satışı 10-14 manat, toyuq ətinin bir kq-nın qiyməti isə 4.5-5 manat arasında dəyişir. Tutaq ki, marketdə 1 kq-lıq kolbasa satılır. Həmin məhsulun tərkibində 1 kq ətlə yanaşı digər qatqıları, daşınmanı, işçi və enerji xərcini də nəzərə alsaq, bir kiloqramlıq kolbasanın satış qiyməti təxmini 15- 20 manat aralığında olmalıdır. Toyuq ətinin bir kiloqramın qiymətinin 5 AZN olduğunu da nəzərə alsaq, kolbasa necə 3 manata satışa çıxarılır? Bu qiymətə olan kolbasa nədən hazırlanır və yaxud bu cür məhsullarla bağlı yoxlama aprılıbmı? Əsas məsələ budur”. 

Mütəxəssis hazırda istehlakçıların ən çox şikayət etdiyi məhsulları da sadalayıb:

“Hazırda ən çox şikayətlər İran istehsalı şirniyyatlar və süd-qatıq məhsullarıdır. Bundan əlavə, havaların istiləşməsi ilə əlaqdar toyuq məhsullarının daşınmasında müəyyən temperatura əməl olunmasında problem yaranır və bununla bağlı da şikayətlərin artması istisna deyil”, - deyə o əlavə edib.

Billurə Yunus