Xankəndidən Bakıya göndərilən məktub: separatçılar niyə görüş istəyir?
Qarabağdakı separatçı rejim Rusiya sülhməramlıları vasitəsilə rəsmi Bakıya görüşün keçirilməsi təklifini göndərib.
"Ölkə.az" xəbər verir ki, separatçılar görüşün Rusiya sülhməramlılarının müvəqqəti nəzarət etdiyi Azərbaycan ərazisində keçirilməsini istəyir.
Bakıda görüşmək təklifindən iki dəfə imtina edən ermənilərin bu istəyinin bir neçə səbəbi var:
- Təmasların qurulmasını beynəlxalq ictimaiyyət istəyirdi, Azərbaycan görüş yeri kimi Bakını təklif edərək, separatçıları dilemma qarşısında qoydu: Bakıya gəlmək inteqrasiya prosesini qəbul etmək, gəlməmək legitim hədəfə çevrilmək deməkdir; görüşdən imtina etdilər, ardınca Azərbaycan Ordusunun keçirdiyi əməliyyata beynəlxalq müstəvidə heç bir etirazın olmaması separatçıların çətin vəziyyətə düşdüyünü təsdiq etdi; indi qondarma rejim “görüş təklifi” ilə təmaslarda maraqlı olduğunu nümayiş etdirmək istəyir;
- Görüşün Rusiya sülhməramlılarının müvəqqəti yerləşdiyi ərazilərdə keçirilməsini istəmələri reinteqrasiya prosesini qəbul etməmək və özlərini tərəf kimi təqdim etmək məqsədi daşıyır;
- Və ən mühüm detal, görüşmək istəyən separatçıların çıxılmaz vəziyyətdə olmalarıdır: sülhməramlılar vasitəsilə Bakıya göndərdikləri təklifdə qeyd olunur ki, “təxirəsalınmaz məsələləri müzakirə etmək istəyirlər”;
Ordumuzun son əməliyyatları nəticəsində separatçıların xarici aləmlə bağlantı yolları tamamilə nəzarətə götürülüb. Məlumatlara görə, bütün “nəfəslikləri” bağlayan rəsmi Bakının son tələbi ermənilərin Azərbaycan vətəndaşlığını qəbul etmələri ilə bağlıdır. Separatçılar erməni əhalisinin bu seçiminin qarşısını alır, lakin yolların bağlanması onların Qarabağdakı əhali üzərində təsir imkanlarını saxlamalarını da çətinləşir. Mümkündür ki, müzakirə etmək istədikləri “təxirəsalınmaz məsələlər” Ermənistanla əlaqələrinin bərpasına nail olmaq, o cümlədən, erməni əhalisinə “işləyirik” mesajı verməkdir. Lakin Azərbaycanın təklifi qüvvədədir: Bakıda görüş və reinteqrasiya məsələlərinin müzakirəsi;
Asif Nərimanlı
Ölkə.az
