NATO-nun 2 əsgəri qətlə yetirildi

Adətən bu cür hücumların arxasında "Taliban" hərəkatının yaraqlıları dayanır

Ölkə.Az xəbər verir ki, Əfqanıstanın cənubunda əfqan hərbçilərinin geyimində olan iki kişi iki NATO hərbçisini güllələməklə qətlə yetirib.

Hadisə alyans hərbçilərinə hücumların tez-tez təşkil edildiyi Gilmend vilayətində qeydə alınıb. Ölənlərin milli mənsubiyyəti barədə hələlik məlumat verilmir. "Reuters"in məlumatına görə, Əfqanıstanın bu hissəsinə olan NATO hərbçilərinin böyük əksəriyyəti amerikalılardır.

Hələlik heç bir qruplaşma baş verənlərə görə məsuliyyəti öz üzərinə götürməyib. Adətən bu cür hücumların arxasında "Taliban" hərəkatının yaraqlıları dayanır.

Xatırladaq ki, bir müddət öncə Əfqanıstan höküməti və kəşfiyyat qrupları “Taliban” terror təşkilatının lideri Molla Ömərin 2 və ya 3 il bundan qabaq öldüyünü açıqlamışdı.

Rəşid Mustafazadə

Ölkə.Az