Məşhur alimdən qara dəliklərlə bağlı sensasion nəzəriyyə

"Təslim olmayın. Çıxış yolu var"

Ölkə.Az xəbər verir ki, məşhur britaniyalı fizik Stiven Hokinq qara dəliklərlə bağlı yeni nəzəriyyə irəli sürüb.

Stokholm şəhərində konfransda çıxış edən alimin fikrincə, qara dəliklərdən də çıxış yolu var, ancaq buna nail ola bilənlər başqa kainata düşəcəklər.

"Qara dəliklərlə bağlı alternativ nəzəriyyələrin mövcudluğu bunun mümkün olduğunu təxmin edir. Qara dəlik kifayət qədər iri olmalıdır və əgər o fırlanacaqsa, çox güman ki, orada başqa dünyaya çıxış olacaq. Lakin oradan bizim kainata qayıtmaq artıq qeyri-mümkün olacaq. Mən kosmik səyahətlərdə maraqlı olsam da, bunu sınamazdım. Qara dəliyə düşdüyünüzü hiss edirsinizsə, təslim olmayın. Çıxış yolu var", - deyə Hokinq bəyan edib.

Qeyd edək ki, qara dəlik sözü ilk dəfə 1968 ildə Amerika astronomu Con Uiller tətbiq etmişdi. Bu dəliklər ümumi nisbilik nəzəriyyəsinə görə hər hansı cisim güclü sıxılarkən yaranan obyektlərdir. Bu zaman cazibə sahəsi o qədər güclü olur ki, işığı, ümumiyyətlə şüalanmanı və ya hissəcikləri buraxmır. Cisim bütün istiqamətlərdə qravitasiya radiusundan kiçik ölçüyədək sıxıldıqda qara çuxur yaranır. Qara dəliyin xarici qravitasiya sahəsi kütlə, hərəkət miqdarı momenti və elektrik yükü ilə təyin edilir. Qara çuxurun ətrafında - güclü qravitasiya sahəsində fəzanın həndəsəsi qeyri-Evklid həndəsəsidir, zaman isə belə cazibə sahəsi olmayan yerə nisbətən ləngiyir.

Qara dəlik hərəkət miqdarı momentinə malikdirsə, onun yaxınlığındakı bütün cisimlər qara çuxur ətrafına fırlanma hərəkətinə cəlb edilmiş olur. Maddə və şüa qara çuxura ancaq daxil ola bilər, oradan isə çıxa bilməz. Kənar müşahidəçi qara çuxura düşən maddədə nə baş verdiyini heç vaxt bilmir.

Rəşid Mustafazadə

Ölkə.Az