\"Azdrama\"da bir yumruğa qonaqlıq

İntiqam VALEHOĞLU

Camaat, gözünüz aydın olsun, yumruqlaşan xalq artistlərimiz barışdılar. Ramiz Novruzla Ramiz Məliki deyirəm. Kimin nə nəzir-niyazı, qurbanı varsa, kəsib paylasın. Mən qonşuluqdakı qəssabla danışmışam. Söz verib ki, sentyabrın əvvəlinə yaxşı bir qurbanlıq toğlu gətirəcək. Sonra o toğlunu kəsib yeddi qapıya paylayacağam. Elə bilirsiniz "Azdrama"da baş verənlər mənim xoşuma gəlir? Gül kimi yazılarım qalıb bir qıraqda, oturub kimin kimə neçə yumruq vurduğunu sayıram. Yazmayanda da camaat soruşur ki, bala, niyə birdən-birə dayandın, nə oldu sənə, nə oldu böylə? Başa sala bilmirəm ki, qorxuram. Sabah o yumruqlardan biri mənə dəysə, kim xəstəxanaya yanıma bir qazan yemək gətirəcək? Heç qamburger də gətirən olmayacaq. Qamburger sözünü yazanda mədəmdən elə bir səs gəldi ki...

Elə mədəmdən gələn bu romantik səsin müşayiəti ilə növbəti cümlələrimi sizə ərməğan edirəm. Hə, onu deyirdim axı, sənətkarlar barışıblar. Deyilənə görə bir yığıncaq olub. Yığıncaqda Ramiz Novruz hamının qarşısında Ramiz Məlikdən üzr istəyib. Barışıq mərasimi "Azdrama"nın direktoru İsrafil İsrafilovun iştirakı ilə baş tutub. Yeri gəlmişkən, bu "baş tutub" sözü iki və daha çox mənada işlədilir. Burada isə mərasimin direktorun iştirakı ilə keçirildiyi, rəsmiləşdiyi mənasını daşıyır. İzahı ona görə verirəm ki, bəzən zarafatcıl oxucular mənə yazırlar ki, ay xətakar, o nəydi yazmışdın? Nəysə, uzun sözün qısası, mərasimdə teatrın truppa müdiri, direktoru və xalq artistlərinin davasında aranı sakitləşdirmək kimi xoşməramlı missiyanı yerinə yetirmiş əməkdar artist Kazım Abdullayev iştirak edib. Bu, Ramiz Novruzun mətbuata dedikləridir. Kazım müəllim də deyir ki, and olsun teatrımızın aylardır bilet satılmayan kassasına, and olsun dövlət idarələrinə paylanan dəvətnamələrə, and olsun xalq artistinin gənc aktrisaya atdığı dikdaban ayaqqabıya, and olsun verilməyən "sutkalıqlar"ımıza, and olsun bu kimi digər müqəddəs məfhumlara, mən o məclisdə olmamışam. Doğrusu, bu sözlərdən sonra məndə belə bir şübhə yaranıb ki, görəsən adıçəkilən digər şəxslər də həmin məclisdə olublar, yoxsa yox?

Hər nə olubsa, olub. Keçənə güzəşt deyərlər. Əsas odur ki, Ramiz Məlik salamatdır, Ramiz Novruz üzrxahlıq edib. Olur da. Guya kim dalaşmır ki? İdmançılar rinqdə bir-birlərini al qana boyayırlar, axırda qucaqlaşıb görüşürlər. Heç orda qonaqlıq zad da verən olmur. Hələ Ramiz Novruz sağ olsun ki, bir yumruğa görə o boyda xərc çəkib. Yeri gəlmişkən, bir ideya verim. Əgər teatr rəhbərlərinin xoşuna gəlsə, məndən icazə almaq şərtilə istifadə edə bilərlər.

Teatrdakı elanlar lövhəsinin böyründə kiçik bir lövhə də düzəldilsin. Həmin lövhədə bu kimi neqativ hallarla bağlı "cəza növləri" adlı bir siyahı asılsın. Məsələn, bir yumruğa görə qonaqlıq. Əgər yumruq babat tutmayıbsa, xəsarət yoxdursa, dönər qonaqlığı da ola bilər. Necə ki, qanunda ağırlaşdırıcı və yüngülləşdirici hallar var ha, bax elə bir şey. Əgər yumruğu atan şəxs bunu ilk dəfə edirsə, yüngülləşdirici hal kimi qamburger qonaqlığı ilə məsələyə xitam verilə bilər. Məsələn, tərəflər mübahisə zəminində şillələşiblərsə, qəşəng çay süfrəsi ilə söhbəti bağlamaq olar. Ancaq yanında qəlyan olması şərti ilə.

Ağır cəza növlərinə gəlincə, bunun da yolunu tapmışam. Təbii ki, sonda söz teatr rəhbərlərinindir. Mənim işim vətəndaş kimi təklif verməkdir. Söz azadlığı deyil bəyəm?

Tutaq ki, bir aktyor digəri ilə dalaşıb və ona təpik vurub. Bax təpiyin cəzası nə dönər, nə qamburger, nə də çay süfrəsi ilə ödənilə bilməz. Burada söhbət minimum ortabab bir banketdən gedir. Bəli, bəli banketdən. Zarafat deyil e, o boyda təpik. Kimə desən ki, bir təpiyi çay süfrəsi ilə bağlamışam, adama gülərlər.

Milli Kulinariya Mərkəzinin direktoru Tahir Əmiraslanovun işinə qarışmaq kimi çıxmasın. Bir başqa təklifim də var. Bu təpikdən sonra verilən banket var ha, oradakı təamlar da mərasimə uyğun olsa, heç də pis olmaz. Həm də bu adda təamlar milli mətbəximizdə mövcuddur. Məsələn, şapalaq kababı, döymə kabab, çığırtma, şişləmə, dişləmə, közləmə, pazlama...yox, yox bu axırıncı səhv oldu. Yəni bu məqamlar da nəzərə alına bilər.

İsrafil müəllim demişkən, inanın səmimiyyətimə ki, bu yazdıqlarım boğazdan yuxarı, klaviaturadan aşağı sözlər deyildir. İstədiyim odur ki, mədəniyyət ocaqlarımızda mədəniyyətsiz hallara yol verilməsin. Aktrisa aktrisanın saçını ancaq səhnədə yolsun. O da əgər rejissor ehtiyac bilərsə. İstəyirəm ki, direktoru bir həftə axtarandan sonra səs-sədasını xaricdən, bir gün sonra da qonaqlıqdan eşitməyək. Lazım olan vaxt çıxıb mətbuata ürəklə danışa bilsin.

Elə indicə aldığım məlumata görə, axşam yaxşı bir çay süfrəsi olacaq. Bir tanış uşağı şapalaqlayıblar. Gedək görək yeyib-içmək də verirlərmi?