Vərəm xəstəliyi ilə bağlı vəziyyət qorxuludurmu? - Dövlət İnstitutu və həkim açıqladı

Mövzu ilə bağlı Elmi-Tədqiqat Ağciyər Xəstəlikləri İnstitutundan Ölkə.Az-ın sorğusuna cavab olaraq vərəmə yoluxma hallarının artmadığı, əksinə, azaldığı bildirilib:

“Son statistik məlumatlara əsasən, Azərbaycanda 2022-ci ildə cəmi 2877 ilkin, yəni ömründə ilk dəfə vərəm xəstəliyinə yoluxan insan aşkarlanıb. Son on ildə bu göstəricinin 2 dəfə azalması qeyd edilir. Bu da xəstəliyin vaxtında aşkar edilməsi, xəstənin dərhal müalicəyə cəlb olunması və müalicə kursunu uğurla başa çatması ilə əlaqədardır. Birmənalı vərəmə yoluxma hallarında artım qeyd olunmur”.

Həmçinin o da bildirilib ki, ölkəmizdə bu xəstəliyə yoluxanlar əsasən, orta yaşda olan (25-45 yaş arası) kişilər arasında müşahidə olunur. 

İnstitutun vərəm xəstələrinin sayının artması ilə əlaqədar oksigen balonları alması barədə məlumatlara gəlincə isə, bunun pulmonoloji xəstələr üçün olduğu deyilib:

“Ağciyər Xəstəlikləri İnstitutunda həm vərəm, həm də pulmonoloji (qeyri-spesifik, yəni vərəm xəstəliyi olmayan) xəstələr stasionar müalicə alır. İnstutun reanimasiya şöbəsi 25 çarpayıdan ibarətdir: 15 çarpayı - pulmonoloji və 10 çarpayı - vərəm xəstələri üçün.  Əlbəttə ki, reanmasiyada müalicə alan xəstələr- kliniki ağır xəstələrdir və oksigen təminatına ehtiyacları var. Bu hal heç də vərəm xəstələrin sayının artması ilə əlaqədar deyil”.

İnstitutdan son olaraq qeyd edilib ki, ölkəmizdə vərəmlə bağlı epidemioloji vəziyyət nəzarət altındadır:

“Görülən işlər nəticəsində vərəm xəstəliyin aşkarlanması, müalicəsi, profilaktikası aparılır. Azərbaycanda yaşayan bütün insanlar üçün tam pulsuzdur. Vərəm - sağalan xəstəlikdir”.

Allerqoloq-pulmonoloq Ramin Nəriman isə Ölkə.Az-a açıqlamasında söyləyib ki, hansısa bir həkimin vərəm xəstələrinin sayının artdığını deməyə hüququ çatmır. Həkim fikrini onunla əsaslandırıb ki, vərəm xəstələri özəl müəssisələrdə müalicə oluna bilmədiyi üçün bütün xəstələr rəsmi qeydiyyatdadır:

“Ümumiyyətlə, kimsə iddia edirsə ki, ölkədə vərəm xəstələrinin sayı artıb, deməli, onun bu xəstəlik haqqında məlumatı yoxdur. Vərəm əvvəlcədən Azərbaycanda yüksək olub, indi isə hansısa artım yoxdur. Əsasən Birinci Qarabağ Müharibəsi dövründə daha çox artım olub, sonra tədricən azalıb. Bu barədə kiminsə kənarda nə isə demək hüququ yoxdur. Hansısa həkim qısa müddət ərzində 5 vərəm xəstəsinə baxırsa, o demək deyil ki, sayda artım var. Vərəm statistikası konkret olaraq aparılan bir xəstəlikdir. Bu xəstələrin nə özəl mərkəzlərdə, nə başqa yerlərdə müalicə olunmaq hüququ var. Onlar yalnız və yalnız ixtisaslaşmış vərəm müəssisələrində müalicə olunmalıdır. Ona görə də onlar ixtisaslaşdırılmış vərəm müəssisəsinə müraciət edən gündən onlar qeydiyyata alınır və bunun əsasında bilinir ki, nə qədər vərəm xəstəsi var və neçəsi sağalıb”.

Billurə Yunus