"Hər 100 manatın 21 manatında pozuntu olub"

"Ölkə.Az" xəbər verir ki, bunu iqtisadçı deputat Vüqar Bayramov deyib. O bildirib ki, bu audit çərçivəsində 2 milyard 353 milyon manat audit olunub: "Bu o deməkdir ki, uyğunluq auditi çərçivəsində yoxlanmış hər 100 manatdan 21 manatında pozuntu qeydə alınıb. Eyni zamanda uyğunsuzluq müəyyənləşdirilmiş məbləğin 73%-i, yəni 349 milyon manatı geri qaytarılması mümkün olmayan vəsaitlərdir. Bu isə kifayət qədər ciddi maliyyə araşdırması tələb edir".

Millət vəkilinin sözlərinə görə, Palata fəaliyyət göstərdiyi dövrdə yalnız bir dəfə pre-audit keçirib: "Halbuki pre-audit nəzarətin keyfiyyətinin artırılması baxımından çox vacibidr. İNTOSAİ-in əsas tövsiyyələrindən biri də İnformasiya texnologiyası auditinin aparılmasıdır. Lakin hələ də Palata tərəfindən bu audit növündən istifadə olunmur. Halbuki bu auditdən istifadə nəzarətin miqyasının genişləndiriməsinə imkan yarada bilər".

"2022-ci ildə səmərəlilik auditinin nəticələri 5-dir, yalnız 1 səmərəlilik auditi nəticəsində nəticəlilik ilə yanaşı qənaətlilik və səmərəlilik meyarları nəzərə alınıb. Bu isə ondan xəbər verir ki, səmərəlilik auditinin meyarlarının təkmilləşdirilməsinə ehtiyac var. Eyni zamanda, səmərəlilik auditinin ümumi auditdə payı cəmi 11,9%, orta müddətli dövr üçün hədəf isə 15% idi. Səmərlilik auditinin sayının az olması nəzarət mexanizmlərinin keyfiyyətinə birbaşa təsir göstərir", - deyə V. Bayramov əlavə edib.

Könül
Ölkə.Az