İranla işləmək istəyən şirkətlərə iki şərt: ya pul, ya texnologiya

"Ancaq biz keçmişi unutmamalıyıq"

Ölkə.Az-ın xəbərinə görə, İran İslam Respublikasının vitse-prezidenti Soren Sattari bəyan edib ki, nüvə razılaşmasının əldə olunmasından sonra qərb şirkətləri iran bazarını mənimsəməyə başlasa da, Tehran sanksiya rejiminin ağır nəticələrini hələ unutmayıb.

"Ancaq biz keçmişi unutmamalıyıq. Mən sanksiya rejiminə görə xalqımızın yaşamağa məcbur olduqlarından danışıram. Bəzən tibbi ləvazimatların çatışmazlığına görə xəstələrimizi müalicə edə bilmirdik. Sanksiya dövründən sonra İranla işləmək istəyən istənilən şirkət ölkəmizə ya pul, ya da texnologiya gətirməlidir", - deyə Sattari bildirib.

Xatırladaq ki, iyul ayında Vyanada İran ilə altılıq ölkələri arasında aparılan danışıqlarda ötən gün razılaşma əldə olunub. Bu razılaşmaya görə, İran daxilində nüvə obyektlərinin təftişi - BMT inspektorlarına hərbi obyektləri təftiş etməyə icazə verilə bilər, amma bu avtomatik olmaya bilər.

İran razılaşır ki, əgər razılaşmanı pozarsa, sanksiyalar 65 gün ərzində bərpa oluna bilər. Bundan başqa, BMT-nin silah embarqosu və raket sanksiyaları 5-8 il ərzində qüvvəsində qalacaq.

İran ilə altılıq ölkələri arasında əldə olunan bu razılaşma dünyada birmənalı qarşılanmayıb. Bir çox ölkə İranla "altılıq" arasında əldə olunan razılığı dəstəkləsə də, digərləri tənqid edir.

Rəşid Mustafazadə

Ölkə.Az