NATO-nun Gürcüstanda hərbi baza açmaqda məqsədi nədir?

Xəbər verdiyimiz kimi, dünən Gürcüstanın paytaxtı Tbilisi yaxınlığında "Krtsanisi" hərbi bazasında NATO və Gürcüstanın birgə hərbi tədris mərkəzi açılıb.

NATO-nun üzvü olmayan keçmiş SSRİ ölkəsində bu cür mərkəzin açılmasının arxasında nə durur? Bunu Gürcüstanın NATO yolunun davamı kimi qiymətləndirmək olarmı? "Krtsanisi" hərbi bazasının əsl məqsədi nədir?

Ölkə.Az-a danışan gürcü politoloq Gela Vasadze mərkəzin açılmasının müsbət hal olduğunu bildirib.

Onun fikrincə, vaxtilə Rusiya Gürcüstanın NATO-ya daxil olmaması üçün əlindən gələn hər şeyi etsə də, Kremlin gücü iqtidarında olmayan məsələlər də var.

"Sözügedən baza NATO-Gürcüstan münasibətləri ilə bağlı olan digər nüanslar kimi həm Gürcüstanın təhlükəsizliyi, həm də Cənubi Qafqazda stabilliyin qorunmasında növbəti kərpicdir. Təbii ki, bu, başlanğıc deyil. Bizim həm Şimal Atlantik alyansı, həm də NATO ölkələri ilə bir sıra müqavilələrimiz var. Burada ABŞ-la strateji əməkdaşlıq haqqında xartiyanı qeyd etmək lazımdır. Onu deyə bilərəm ki, formal olaraq təsdiqlənməsə də, Gürcüstan artıq NATO-dadır", - deyə Vasadze qeyd edib.

Mərkəzin açılmasının məqsədləri barədə danışan politoloq bildirib ki, məqsəd birdir - Rusiyanın Qafqazdakı təcavüzkar siyasətinə cavab verməkdir.

"Məqsədlərdən biri də olduqca mühüm olan nəqliyyat və energetik dəhlizin təhlükəsizliyini təmin etmək, Gürcüstan və Cənubi Qafqaz ölkələrinin stabil inkişafı üçün şərait yaratmaqdır", - deyə ekspert əlavə edib.

"NATO-nun üzvü olmayan keçmiş SSRİ ölkəsində bu cür mərkəzin açılması misli görünməmiş addımdır".

Bunu Gürcüstanın keçmiş müdafiə nazirinin müavini Georgiy Muçaidze BBC-ə açıqlamasında vurğulayıb.

Onun fikrincə, hazırda Rusiya siyasəti Gürcüstanın müstəqil dövlət kimi mövcudluğunun, xarici və təhlükəsizlik siyasəti aparmasının qarşısını almağa yönəlib.

"Ölkənin müdafiə qabiliyyətinin güclənməsi, demokratikləşmə və müstəqilliyin səviyyəsinin artması daima Rusiyanın indiki hakimiyyətini qıcıqlandıracaq. Bu gün Rusiya Qərbdə müttəfiq kimi yox, təhlükə kimi qəbul olunur", - deyə Muçaidze ifadə edib.

Qeyd edək ki, analoji NATO mərkəzi bir neçə ildir ki, Gürcüstanın Saxçere şəhərində fəaliyyət göstərir.

Rəşid Mustafazadə

Ölkə.Az