Azərbaycanda bu sahədə qiymətlər endirilməlidir - Deputatdan maraqlı təklif

"Ölkə.Az" xəbər verir ki, bunu iqtisadçı deputat Vüqar Bayramov deyib. O bildirib ki, turizm neftdən sonra Azərbaycana ən çox valyuta gətirən sektordur: "Pandemiyadan öncə illik turizm gəlirləri 2,7 milyard dollara yaxın idi. Bu sektor həmçinin məşğulluğa da xüsusi töhvə verir. Bu baxımdan, turizm infrastrukturunun daha da inkişaf etdirilməsi və qiymətlərin  optimallaşdırılması Azərbaycana və eləcə də regionlara daha çox turistin gəlməsinə imkan yarada bilər". 

Millət vəkilinin sözlərinə görə, monitorinqlər nəinki Bakıda, hətta bölgələrdə də turizm xidmətlərinin qiymətlərinin yüksək olaraq qaldığını göstərir. Bu da həm daxili, həm də gəlmə turizmin inkişafına təsirsiz ötüşmür. 2023-ci ilin ilk rübündə ölkəmizə gələn turistlərin sayında artım müşahidə olunsa da, daha qısa zamanda prepandemiya göstəricilərinə çatmaq hədəflənməlidir.

"Eyni zamanda, regionlarda çoxulduzlu hotellərlə bərabər, 1 və 2-ulduzlu otellərin tikilməsi oludqca vacibdir. Belə hotellərin qiyməti daha aşağı olur və daha çox turistlər cəlb edir. Təəssüf ki, bu gün ölkəmizdə sahibkarlar daha çox 4-5-ulduzlu, bahalı hotellərin tikintisinə maraq göstərirlər. Az ulduzlu hotellərin inşaatının sürətləndirilməsi üçün bu istiqamətə daha çox aşağı faizli kreditlərin ayrılması və güzəştlərin tətbiqini aktuallaşdırır. Bu sahibkarların stimullaşdırılması baxımdan vacibdir", - deyə V. Bayramov əlavə edib.

Qeyd edək ki, Azərbaycana gələn xaricilərin 8,9%-i Qusarda, 3,5%-i Naftalanda, 3,2%-i Qəbələdə, 1,8%-i Qubada, 0,4%-i Naxçıvan Muxtar Respublikasında, 0,3%-i Şabranda, 1,8%-i isə digər şəhər və rayonlardakı mehmanxanalara üstünlük veriblər.

Könül
Ölkə.Az