Bu ərazidə əhali kənar şəxslərin dəfninə qadağa qoyub - Bələdiyyə sədri danışdı - FOTO
Ölkə.Az xəbər verir ki, kənd əhalisi tərəfindən hazırlanan elanda kənar şəxslərə kənddə dəfn edilmək “qadağan edilib”.
Elanda deyilir:
“Bülbülə kənd qəbiristanlığında yeri olmayan kənar şəxslərin dəfn olunmasına kənd əhalisi icazə vermir! Halallıq verilmir!”
Elanla bağlı Ölkə.Az-a açıqlama verən Bülbülə bələdiyyəsinin sədri Natiq Həsənov qəbisirtanlığın çoxdan dolduğunu söyləyib:
“Bülbülə kəndində cəmi bir qəbiristanlıq var. O da 1-1.5 əsr əvvələ aiddir. Düzdür, qəbiristanlıqlar bələdiyyəyə verilib, amma ora çoxdan dolub.
Orada hər kəsin özünün “aqradası var”. Yəni əlavə torpaq sahəsi yoxdur ki, kimsə kənardan gələn adam orada dəfn olunsun.
Məsələn, kiminsə ata-anası həmin qəbiristanlıqda basdırılıb, onun yanında yeri varsa, ancaq həmin adamlar öldükdə qəbiristanlıqda dəfn edilir. O yerləri də sovet vaxtı ölənlərin yaxınları dəmir barmaqlıqlarla əhatəyə alıblar.
Bülbülə qəsəbəsindən hava limanına gedən yolun sol hissəsində “Ramanı sovxozu” deyilən yerdə qəbiristanlıq var. Sabunçu rayonunun ərazisi olsa da, əhali artıq orada da dəfn olunur”.
Elanla bağlı danışan bələdiyyə sədrinin sözlərinə görə, kənar insanların orada dəfn olunması mümkün deyil:
“Bülbülə kənd qəbiristanlığında dəfn olunanlar yerli və qeydiyyatı Bülbülə qəsəbəsində olan sakinlərdir. Elə adamlar var ki, ana-atası orada dəfn olunub, özü indi Sabunçuda yaşayır. Onlar bizə müraciət edəndə aydınlaşdırırıq ki, bu adamların nəslindən kimlərsə həmin qəbiristanlıqda dəfn olunubsa, yanında yerləri varsa, bu halda dəfnə şərait yaradırıq”.
Bülbülə kənd qəbiristanlığının dolduğunu deyən bələdiyyə sədri kənd sakinləri üçün əlavə qəbir yerlərinin ayrılması ilə bağlı Bakı Şəhər İcra Hakimiyyətinə müraciət edəcəklərini bildirib.
Billurə Yunus
