ABŞ: “Əsədin istefası İŞİD-ə qalib gəlmək üçün şərtdir”
ABŞ Dövlət Departamenti hesab edir ki, İŞİD terror qruplaşması üzərinə qələbə çalmaq üçün Suriya prezidenti Bəşər Əsədin hakimiyyətdən getməsi mütləqdir.
Belə bir bəyanatı Departament Moskvada Amerikanın Suriya üzrə xüsusi elçisi Maykl Ratni ilə rusiyalı rəsmi şəxslərin görüşünün yekunu əsasında verib.
Sənəddə həmçinin deyilir ki, “öz qəddar və repressiv taktikası ilə Bəşər Əsəd çoxdan sübut edib ki, ölkənin prezidenti kimi öz legitimliyini itirib”.
“Biz başa düşürük ki, Əsədin hakimiyyətdə qalması regionda ekstremizmi qızışdırır və gərginliyi artırır. Məhz buna görə siyasi keçid təkcə Suriya xalqının rifahı üçün yox, həm də ekstremizmlə mübarizə üçün vacibdir” – bəyanatda vurğulanır.
Az öncə Departament rəsmisi Con Kirbi bildirmişdi ki, ABŞ İŞİD-lə mübarizədə Bəşər Əsədi tərəfdaş qismində görmür. (musavat)
Ölkə.Az
