Bütün icbari sığortalar elektron müqaviləyə keçiriləcək - Bu ildən
"Ölkə.Az" Report-a istinadən xəbər verir ki, bunu jurnalistlərə açıqlamasında İcbari Sığorta Bürosunun (İSB) icraçı direktoru Rəşad Əhmədov deyib.
R.Əhmədov bildirib ki, may ayının sonuna kimi daşınmaz əmlakın icbari sığortası elektronlaşdırılacaq və artıq İcbari Sığorta Bürosunun sistemi ilə İqtisadiyyat Nazirliyi yanında Əmlak Məsələləri Dövlət Xidmətinin sistemi arasında inteqrasiya bitib: "Yaşıl Kart" istisna olmaqla digər bütün kağız sığorta müqavilə daşıyıcıları elekron müqavilələrlə əvəzlənəcək".
Onun sözlərinə görə, bu günə qədər icbari avtomobil sığortası üzrə 210 min müqavilə elektron qaydada bağlanılıb.
Xatırladaq ki, avtomobillərin icbari sığortasında İcbari Sığorta Bürosu ilə Daxili İşlər Nazirliyinin məlumat bazası artıq inteqrasiya edilib və sığortasız avtomobilləri cərimələmək imkanı yaranıb. O cümlədən, Azərbaycanda istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta müqaviləsi elektronlaşdırılıb. Beləliklə, işəgötürənin məsuliyyət sığortası sahəsində İSB ilə müvafiq qurumun məlumat bazasının inteqrasiyası şirkətlərin işçilərin sığortasından yayınmasının qarşısını alıb.
