Həm oğlan, həm də qız tərəf bədbəxt olur, bu nə deməkdir?

Son dövrlər Azərbaycanda da boşanmaların artdığını nəzərə alsaq, bu cür qanun layihəinin ölkəmizdə də tətbiq edilib-edilməməsi sual doğurur.

Mövzu ilə bağlı Ölkə.Az-a danışan Ağ Partiyanın sədri Tural Abbaslı hər 3 ailədən birinin dağıldığını deyərək, aidiyyəti qurumları tədbir görməyə çağırıb:

“Keçən səfər statistikaya baxdım. Səhv etmirəmsə, bir il ərzində Azərbaycanda evlənənlərin 30%-i boşanmışdı. Bu, kifayət qədər böyük bir rəqəmdir. Təsəvvür edin ki, hər 3 ailədən biri boşanır. Bu o deməkdir ki, həm oğlan, həm də qız tərəf bədbəxt olur. Yəni yarımçıq proses yaşanır.

Əgər ailədə uşaqlar varsa, ümumiyyətlə, psixoloji və gərgin yaşayırlar. Cəmiyyət deqradasiyaya uğrayır.

Ailə dövlətin təməlidir. Ona görə də dövlətlər çalışmalıdır ki, ailələr möhkəm qurulsun və davamlılığı olsun. Sağlam ailədə böyüyən uşaqla sağlam olmayan mühitdə böyüyən uşaq məhsuldarlıq, sağlamlıq və hər baxımdan eyni ola bilməz.

Təəssüf ki, bizim cəmiyyətdə, dövlətdə heç müzakirə belə getmir. Düzdür, Ailə Qadın və Uşaq Problemləri üzrə Dövlət Komitəsi var. Bu qurum arada bir humanitar xarakterli çıxışlar edir. Lakin səbəblər araşdırılmır, aradan qaldırılmır. Məsələn, 30% boşanmaların əsas səbəbi nədir? Bu barədə ciddi araşdırma belə yoxdur”.

Ailələrin dağılma səbəbləri arasında maddi sıxıntıların böyük rol oynadığını düşünən partiya sədri hesab edir ki, evli cütlüklərə mütləq dövlət dəstəyi olmalıdır:

“Rusiya artıq uzun illərdir bu məsələni yaşayır. Çünki Rusiyada daha çox Qərb dəyərləri olduğu üçün ailə institutu zəifləyir. Biz Şərq dövlətiyik, dəyərlərimiz türk-müsəlman dəyərləri olduğu üçün ailə institutu önəmlidir.

Qloballaşan dünyanın bizə də təsirləri var. Eyni zamanda psixoloji sıxıntılar və s. ailə institutunun məhv olmasına gətirir.

Çox istərdim ki, parlamentdə və aidiyyəti qurumlarda bu məsələlər müzakirə olunsun. Hansısa stimullaşdırıcı addımlar atılsa, yaxşı olardı. Şərt deyil ki, evli qaldıqları hər ilə görə və ya hər 5 ildən bir dövlət maliyyə ayırsın. Səbəb araşdırılsın və aradan qaldırılsın”.

T.Abbaslı maddi durumun yaxşılaşacağı təqdirdə boşanmaların 2 dəfə azalacağından əmindir:

“Müşahidələrim onu deməyə əsas verir ki, ailələlərə dəstək verilsə, boşanmaların sayı azı 2 dəfə azalar. Çünki bütün problemlər sıxıntılardan, çatışmazlıqlardan başlayır. Bu elə bir məsələdir ki, fəsadları 10 il görünmür. Bugünkü statistika 10-15 ilin nəticəsidir.

Düşünürəm ki, dövlət həm evliliyi, həm də artıq evli şəxslərin ailəsinin davamlılığını maddi, mənəvi stimullaşdırmaq üçün hansısa addımlar atmalıdır. Heç kim deməsin ki, bu bizdə yoxdur. Var və aradan qaldırmasaq, yaxın zamanlarda fəsadlarını görəcəyik”.

Billurə Yunus