Erməni politoloq: "Rusiya Ermənistanı açıq şəkildə alçaldır və istismar edir"
Ermənistanın ən tanınmış politoloqlarından biri sayılan İqor Muradyan regionda baş verən iqtisadi, siyasi və hərbi prossesləri şərh edib.
Ölkə.az xəbər verir ki, erməni mediasına danışan Muradyan Rusiyanı sərt tənqid atəşinə tutaraq bu ölkəni erməni xalqının bütün bədbəxtliklərində günahlandırıb. O, qeyd edib ki, Ermənistanın Avrasiya İttifaqına inteqrasiyası prosesinin iflasa uğramasından sonra Rusiya açıqdan-açığa şantaj siyasətinə keçib.
"Rusiyanın bu planı boşa çıxdıqdan sonra Moskva şantaja keçdi. Bütün vasitələrdən istifadə olundu, qazın qiymətləri qalxdı, elektrik enerjisinin qiymətlərinin qalxacağı haqda xəbərlər yayıldı, Qarabağ cəbhəsində gərginlik artdı, rusiyapərəst müxalifət fəallaşdı. Bu müstəmləkəçilik siyasətidir. Bütün bunlar onu göstərur ki, Rusiya Ermənistanı müstəmləkəsi kimi saxlamaq, nəyin bahasına olursa-olsun bu regionda qalmaqda maraqlıdır", Muradyan bildirib.
Daha sonra erməni cəmiyyətinin siyasi tərcihini şərh edən erməni politoloq ölkə əhalisinin böyük əksəriyyətinin Qərbə inteqrasiya tərəfdarı olduğunu vurğulayıb.
"Ermənistanda kütlələrin səsini, onların tələbini işıqlandırmaq üçün normal, müstəqil KİV-lər belə yoxdur. Ölkənin bütün aparıcı media orqanları biznesi Rusiya ilə əlaqədar olan şəxslərin nəzarətindədir. Onlar ölkədə baş verənləri olduğu kimi işıqlandırmırlar. Hakimiyyətin və Rusiyanın əlyhinə olan fikirləri geniş tamaşaçı auditoriyasına çatdırmırlar, buna görə də kənar belə təsəvvür yaranır ki, Ermənistanda hamı Rusiyanın tərəfdarıdır. Müxalifətin əlində beş-altı sayt və qəzet var və bunula da ölkədə baş verənləri tam işıqlandırmaq mümkün deyil", deyə İqor Muradyan sözlərinə davam edib.
"Rusiya ATƏT-in Minsk qrupunun həmsədridir, amma Qarabağ münaqişəsinin həlli üçün heç bir iş görməyib və özünü də Ermənistanın təhlükəsizliyinin qarantı elan edib. İndiyədək Rusiya Ermənistanın təhlükəsizliyinin təmini üçün heç nə etməyib. Rusiyanın bütün məqsədi konfliktdən istifadə edərək regiondakı hərbi varlığını davam etdirməkdir", deyə açıqlamasının sonunda Muradyan vurğulayıb.
Ölkə.az
