Bu, bank sektoruna baş ağrısı gətirəcək - ŞƏRH
"Günay Bank”ın Azərbaycan Bank bazarına yenidən daxil olması müəmmalarla, suallarla dolu idi. Hətta 2018-də sədr müavini 100 mln. manat, 2021-də isə filial rəhbərlərindən biri 53 mln. manat mənimsəmə iddiası ilə saxlanılmışdı. Ümumiyyətlə, 90-ların biznes və siyasi elitası ciddi problemdir, amma indi “Günay Bank” ləğv edildisə bunun bütün bank sektoruna təsirlərini azaltmaq üçün təcili tədbirlər görülməlidir.
"Ölkə.Az" xəbər verir ki, bunu iqtisadçı ekspert Natiq Cəfərli deyib. O bildirib ki, bankda depoziti olan bütün vətəndaşların əmanəti tez və süründürməçilik olmadan, maksimum 1 ay ərzində qaytarılmalıdır: "Əgər vətəndaşların depozitləri ilə bağlı problemlər yaşanarsa, bu, bütün bank sektoruna baş ağrısı gətirəcək.
Ekspert ölkədə müasir bank sisteminin olmadığını deyib: "Bizim banklar hələ də 19-cu əsrin bank məntiqi ilə işləyirlər, ancaq depozit götürüb yüksək faizlə kredit verməklə pul qazanırlar".
"21-ci əsrin bankları başqa cür işləyir. Onlar artıq çoxdan investisiya mərkəzlərinə çevriliblər, bizdə isə investisiya bankçılığı yoxdur. Bu da nə Mərkəzi Bankın, nə də bank sisteminin günahıdır", - deyə N. Cəfərli əlavə edib.
Könül
Ölkə.Az
