\"Azdrama\"nın yeni bədii rəhbərindən jurnalistə qeyri-etik CAVAB:

Akademik Milli Dram Teatrının yeni bədii rəhbəri Azərpaşa Nemətov nəhayət ki, ilk açıqlamalarını verib

Daha doğrusu, buna açıqlama demək mümkün deyil.

Ölkə.Az-ın əməkdaşı xalq artisti ilə əlaqə saxlayaraq, təyinatı barədə fikirlərini öyrənmək istəyib. Amma cəmi bircə günə Nemətovun nitqindəki aqressiya əməlli-başlı "inkişaf edib". Görünür Azərpaşa müəllimin "Azdrama" kimi adlı-sanlı mədəniyyət ocağına bədii rəhbər təyin olunması "ağır otur, batman gəl" prinsipini də işə salıb.

Rejissorla əməkdaşımız arasındakı qısa dialoqu olduğu kimi təqdim edirik.

- Azərpaşa müəllim, istərdim yeni təyinatınız barədə danışasınız. Gözlənilən idimi?

- Mən danışmayacağam. Qardaş, icazə verin bismillah edək də. Gələk işləyək.

- Nə dəyişikliklər olacaq?

- Ay qardaş, hələ bir dayan da. Siz deyəsən gecəni yatmamısınız.

- Gecə yatmamağın məsələyə nə dəxli? Normal sual verirəm, zəhmət olmasa cavablandırın.

- Dayanın da, bu gün gəlmişəm. Siz indi məndən nə istəyirsiniz?

- Soruşuram ki, hər hansı yenilik nəzərdə tutulur?

- Onu eşidib biləcəksiz də.

- Xalq artisti Ramiz Novruz bildirib ki, bundan sonra yaradıcılıq məsələlərinə birbaşa siz cavabdeh olacaqsınız, müəyyən dəyişikliklər nəzərdə tutulur...

- Lazım deyil, mənim ehtiyacım yoxdur. Oldu, sağ olun.

 

P.S. "Siz deyəsən gecəni yatmamısınız" ifadəsinin bir cavabı var idi. Siz isə deyəsən hələ də yuxudasınız. Amma 68 yaşlı "cavana" bu sözləri deməyə tərbiyəm imkan vermədi.

İntiqam VALEHOĞLU
Ölkə.Az